കുറ്റ്യാടിയിലെ ജനരോഷം കണ്ട് തീരുമാനം തിരുത്തിയതുപോലെ ടീച്ചറമ്മയേയും തിരികെ വിളിക്കണമെന്നാണ് പിജെ ആർമിയുടെ ഫേസ്ബുക്ക് പേജിൽ വന്ന കുറിപ്പ്. സിപിഎം കണ്ണൂർ ജില്ലാ മുൻ സെക്രട്ടറി പി ജയരാജന്റെ അനുയായികൾ എന്ന പേരിൽ പ്രചാരണം നടത്തുന്ന ഫേസ്ബുക്ക് പേജാണ് പിജെ ആർമി. എന്നാൽ ഈ പേജുമായി യാതൊരു ബന്ധവുമില്ലെന്ന് പി ജയരാജൻ വ്യക്തമാക്കിയിട്ടുണ്ട്.
നിയമസഭാ തെരഞ്ഞെടുപ്പ് സ്ഥാനാർഥി നിർണയ വേളയിൽ കുറ്റ്യാടി സീറ്റ് കേരളാ കോൺഗ്രസ് എമ്മിന് നൽകുകയും പിന്നീട് പ്രതിഷേധത്തെ തുടർന്ന് തിരിച്ചെടുക്കുകയും ചെയ്തത് സൂചിപ്പിച്ചുകൊണ്ടാണ് പിജെ ആർമിയുടെ ഫേസ്ബുക്ക് പോസ്റ്റ്. ‘”കുറ്റ്യാടിയിലെ ജനരോഷം കണ്ട് തീരുമാനം തിരുത്തിയതുപോലെ ടീച്ചറമ്മയേയും തിരികെ വിളിക്കണം. ലോകം ആദരിച്ച, മഹാമാരി കൊണ്ട് ലോകം വീർപ്പുമുട്ടിയപ്പോഴും ഈ കൊച്ചു കേരളത്തെ മരണത്തിൽ മുക്കിക്കൊല്ലാതെ പിടിച്ചു നിർത്താൻ ടീച്ചറമ്മ വഹിച്ച പങ്ക് അവിസ്മരണീയം. ആരോഗ്യരംഗം പരാജയപ്പെട്ടിരുന്നുവെങ്കിൽ മരണസംഖ്യ വർദ്ധിക്കുമായിരുന്നു. ഒരു പക്ഷേ,തുടർഭരണം നഷ്ടപ്പെടുമായിരുന്നു. ഈ തീരുമാനം ഒരുപാട് അമ്മമനസ്സുകളിൽ വേദനയുണ്ടാക്കുമെന്നത് തീർച്ചയാണ്” എന്നാണ് ഫേസ്ബുക്ക് പേജിൽ വന്ന കുറിപ്പ്.
സിപിഎമ്മിന്റെ തീരുമാനം പുറത്ത് വന്നതിന് പിന്നാസെ ചലച്ചിത്ര താരങ്ങളുൾപ്പെടെ നിരവധിപേരാണ് ശൈലജ ടീച്ചറെ പിന്തുണച്ച് സോഷ്യൽ മീഡിയയിൽ രംഗത്തെത്തിയത്. അതേസമയം പാർട്ടി തന്നെ ഒരു തവണ മന്ത്രിയാക്കിയെന്നും നല്ല നിലയിൽ പ്രവർത്തിക്കാനായതിൽ സംതൃപ്തി ഉണ്ടെന്നുമാണ് പ്രതികരിച്ചത്.
‘ഞാൻ മത്രമല്ലല്ലോ, ഞങ്ങൾ കഴിഞ്ഞ തവണ ഉണ്ടായിരുന്നവർ ആരും തുടരുന്നില്ലല്ലോ, പിന്നെ കൊവിഡ് പ്രതിരോധ പ്രവർത്തനം ശൈലജ ടീച്ചർ ഒറ്റയ്ക്ക് നടത്തിയതല്ലല്ലോ, ഗവൺമെന്റിന്റെ പൊതുവായിട്ടുള്ള പ്രവർത്തനമല്ലേ, ടീം വർക്കല്ലേ’ എന്നായിരുന്നു ശൈലജ ടീച്ചറു പ്രതികരണം.
