ടൈംസ് നൗവിന്റെ സീനിയർ ലേഖകൻ ശ്രേയാഷി ദേ പോസ്റ്റ് ചെയ്ത വീഡിയോയിൽ മഞ്ഞ ടി-ഷർട്ട് ധരിച്ച ഒരു യുവാവ് കൊൽക്കത്ത പട്ടണത്തിലെ ഒരു തെരുവിൽ നടന്നു വരുന്നത് കാണാം. കക്ഷി നേരെ ചെന്നെത്തിയത് ലോക്ക് ഡൗണിൽ പുറത്തേക്കിറങ്ങിയവരെ തടയുന്ന ഒരു ട്രാഫിക് പോലീസുകാരൻ്റെ മുൻപിലേക്ക്. പോലീസുകാരൻ തടഞ്ഞു നിർത്തി കാര്യം ചോദിച്ചപ്പോൾ കഴുത്തിൽ തൂക്കിയിട്ട പ്ലക്കാർഡ് യുവാവ് കാണിക്കുന്നത് വിഡിയോയിലുണ്ട്.
‘മിസ്തി കിന്റേ ജാച്ചി’, എന്നാണ് എഴുതിയിരിക്കുന്നത്. വെസ്റ്റ് ബംഗാളിലെ ഒരു പ്രധാന മധുര പലഹാരമായ മിസ്റ്റി വാങ്ങണം എന്നാണ് എഴുതിയിരിക്കുന്നത്. പോലീസ് യുവാവിന്റെ ഓടിക്കും എന്ന് വിചാരിച്ചെങ്കിലും തെറ്റി. ആ പോലീസുകാരൻ മധുരപലഹാരം വാങ്ങാൻ യുവാവിനെ അനുവദിക്കുകയാണ് ചെയ്തത്. പശ്ചിമ ബംഗാളിലെ ലോക്ക് ഡൗണിൽ അടുത്തിടെ ചെറിയ മാറ്റം വരുത്തിയിരുന്നു. എല്ലാ ദിവസവും രാവിലെ 10:00 മുതൽ വൈകുന്നേരം 5 വരെ തുറക്കാൻ മധുപലഹാര കടകൾക്ക് അനുമതിയുണ്ട്. മധുരപലഹാരങ്ങൾ ഇല്ലാതെ ജീവിക്കാൻ പറ്റാത്ത ബംഗാളി ജനത ഈ സാഹചര്യം പരമാവധി ഉപയോഗപ്പെടുത്തുകയാണ്.
അടുത്തിടെ കേരളത്തിലും ഒരാൾ പോലീസിന്റെ ഇ-പാസ്സിനായി അപേക്ഷിച്ച കാരണം ശ്രദ്ധ നേടിയിരുന്നു. കണ്ണൂർ ജില്ലയിലെ കണ്ണപുരം ഇരിണാവിലെ യുവാവ് ഇ-പാസ്സിനായി അപേക്ഷിച്ചിരിക്കുന്നതിനുള്ള കാരണം വ്യക്തമാക്കിയിരിക്കുന്നത് സെക്‌സിനായി പുറത്ത് പോകണം എന്നാണ്. ആവശ്യം കേട്ട് കൗതുകം തോന്നിയ വളപട്ടണം പോലീസ് അഡ്രസ് തേടി പിടിച്ച് യുവാവിനെ സ്റ്റേഷനിലേക്ക് വിളിച്ചു വരുത്തി ചോദ്യം ചെയ്‌തു. അതെ സമയം അക്ഷരത്തെറ്റാണ് സംഭവിച്ചത് എന്നും 6 മണിക്ക് പുറത്ത് പോവണം എന്നാണ് ഉദ്ദേശിച്ചത് എന്നും യുവാവ് വ്യക്തമാക്കിയതായി കേരളം കൗമുദി റിപ്പോർട്ട് ചെയ്യുന്നു. six o’clock എന്നതിന് പകരം ടൈപ്പ് ചെയ്തത് go for sex എന്നായിപ്പോയി എന്നാണ് വിശദീകരണം. ചെയ്ത തെറ്റിന് മാപ്പ് പറഞ്ഞതോടെ തടി കേടാകാതെ യുവാവിനെ വിട്ടയച്ചു.
