രണ്ടാം പിണറായി വിജയൻ മന്ത്രിസഭയിൽ എല്ലാവരും പുതുമുഖങ്ങളായിരിക്കുമെന്നും മുഖ്യമന്ത്രി ഒഴികെ മറ്റെല്ലവരും മാറി നിൽക്കുമെന്നും ദിവസങ്ങള്‍ക്കു മുൻപേ റിപ്പോര്‍ട്ടുകള്‍ വന്നിരുന്നു. എന്നാൽ ഒന്നാം എൽഡിഎഫ് സര്‍ക്കാരിൽ താരപ്രതിച്ഛായയുണ്ടായിരുന്ന കെകെ ശൈലജയെ മാറ്റി നിര്‍ത്തില്ലെന്ന് പിന്നീട് റിപ്പോര്‍ട്ടുകള്‍ പുറത്തു വന്നിരുന്നു. മട്ടന്നൂരിൽ നിന്ന് ശൈലജയ്ക്ക് വന്ന വൻ ഭൂരിപക്ഷവും പരിഗണനാവിഷയമായി. ഈ സാഹചര്യത്തിൽ കെകെ ശൈലജയെ രണ്ടാം മന്ത്രിസഭയിലും ഉള്‍പ്പെടുത്തുമെന്നായിരുന്നു വിലയിരുത്തൽ.
Also Read:
എന്നാൽ പൊതുജനങ്ങള്‍ക്കിടയിൽ കെകെ ശൈലജയ്ക്കുണ്ടായിരുന്ന പിന്തുണ പാര്‍ട്ടിയ്ക്കുള്ളിൽ ഉണ്ടായിരുന്നില്ലെന്നാണ് പുറത്തു വരുന്ന വിവരം. മന്ത്രിമാരുടെ പേരുവിവരങ്ങള്‍ ഉള്‍പ്പെടുത്തിയുള്ള സിപിഎം ഔദ്യോഗിക പട്ടികയിൽ കെകെ ശൈലജയുടെ പേരില്ല. പാര്‍ട്ടിയ്ക്കുള്ളിലെ സമവാക്യങ്ങളാണ് കെകെ ശൈലജയുടെ രണ്ടാം വരവിന് തിരിച്ചടിയായത്. എന്നാൽ എംവി ജയരാജൻ ഉള്‍പ്പെടെയുള്ളവര്‍ കെകെ ശൈലജയെ പിന്തുണച്ചു. നിലവിൽ ശൈലജയെ പാർട്ടി വിപ്പാക്കാനാണ് പാർട്ടി തീരുമാനം.
അതേസമയം, ശൈലജയെ മാറ്റി നിര്‍ത്തിയ തീരുമാനത്തെപ്പറ്റിയുള്ള മാധ്യമപ്രവര്‍ത്തകരുടെ ചോദ്യത്തിന് ഇത് എൻ്റെ പാര്‍ട്ടിയ്ക്കു മാത്രമേ കഴിയൂ എന്നായിരുന്നു എ എൻ ഷംസീറിൻ്റെ മറുപടി. കെകെ ശൈലജ പ്രഗത്ഭയായ മന്ത്രിയാണെന്ന് സംശയമില്ലെന്നും എന്നാൽ ഇതിനു മുൻപും പ്രഗത്ഭരായ മന്ത്രിമാര്‍ മാറി നിന്നിട്ടുണ്ടെന്നും എളമരം കരീം പ്രതികരിച്ചു. മികച്ച മന്ത്രിയായ തോമസ് ഐസകിന് മത്സരിക്കാൻ പോലും അവസരം നല്‍കിയില്ല. വ്യക്തികളെ നോക്കിയല്ല, ഇത് പാര്‍ട്ടി നയമാണെന്നും അദ്ദേഹം വ്യക്തമാക്കി. അതേസമയം, മുഖ്യമന്ത്രി പിണറായി വിജയൻ്റെ നേതൃത്വത്തിൽ മന്ത്രിസഭ രൂപീകരിക്കുമെന്നത് നേരത്തെ നിശ്ചയിച്ചിരുന്ന കാര്യമാണെന്നും എളമരം കരീം പറഞ്ഞു.
Also Read:
കഴിഞ്ഞ മന്ത്രിസഭയിലെ കെകെ ശൈലജയും മേഴ്സിക്കുട്ടിയമ്മയും ഇത്തവണ മാറി നിൽക്കുമ്പോള്‍ ആര്‍ ബിന്ദുവും വീണ ജോര്‍ജുമാണ് പുതിയ വനിതാ പ്രതിനിധികള്‍. ഇവരുടെ വകുപ്പുകള്‍ ഏതെല്ലാമെന്ന കാര്യത്തിൽ വ്യക്തതയില്ല.
സിപിഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണനായിരുന്നു പുതുമുഖങ്ങളടങ്ങിയ മന്ത്രിമാരുടെ പട്ടിക മുന്നോട്ടു വെച്ചത്. പന്ത്രണ്ട് മന്ത്രിമാരും സ്പീക്കര്‍ സ്ഥാനവുമാണ് എൽഡിഎഫിൽ സിപിഎമ്മിന് നിശ്ചയിച്ചിരുന്നത്. 12 മന്ത്രിസ്ഥാനങ്ങളിലേയ്ക്ക് 16 പേരെയാണ് പരിഗണിച്ചിരുന്നത്. എംബി രാജേഷാണ് നിയമസഭാ സ്പീക്കര്‍ എന്നാണ് റിപ്പോര്‍ട്ടുകള്‍. ചിറ്റയം ഗോപകുമാറാണ് ഡെപ്യൂട്ടി സ്പീക്കര്‍.
