സ്റ്റോൺ സർജറിക്കായി കോഴിക്കോട് ബേബി മെമ്മോറിയൽ ഹോസ്പിറ്റലിൽ ചികിത്സയിൽ കഴിയുകയാണ് സജീഷ് പുത്തൂർ. സർജറി വളരെ ഭംഗിയായി നടന്നെന്ന് പറഞ്ഞ അദ്ദേഹം അതിനിടയിലെ അനുഭവങ്ങളാണ് പങ്കുവെച്ചത്. ‘ആദ്യമായൊരു സർജറിയെ നേരിടുന്ന എല്ലാ ടെൻഷനുമുണ്ടായിരുന്നു. തിയേറ്ററിൽ പ്രവേശിപ്പിച്ച ഉടനെ നഴ്സുമാർ തന്ന ആത്മധൈര്യം വളരെ വലുതായിരുന്നു. അവരുമായുള്ള സ്നേഹ സംഭാഷണങ്ങൾക്കിടയിൽ ലിനിയുടെ സേവനമഹത്വത്തിൽ അവർ പറഞ്ഞത് ഇപ്പോഴും ചെവിയിൽ മുഴങ്ങുന്നു’ന്നെന്നും സജീഷ് പറയുന്നു.
സർജറിക്കിടയിൽ നഴ്സുമാരുടെ ആത്മസമർപ്പണവും ത്യാഗ മനോഭാവവും നേരിട്ടനുഭവിക്കാനിടയായി. ലിനിയുടെ സാമീപ്യം അവരിലൂടെ അനുഭവിക്കുകയായിരുന്നെന്നും സജീഷ് പറഞ്ഞു. ലിനിയുടെ വിടവ് ഒരിക്കലും നികത്താനാവുന്നതല്ലെന്നും അദ്ദേഹം കുറിച്ചു.
സർജറിക്കു ശേഷം ഐസിയുവിലുള്ള നഴ്സുമാരുടെ കരുതലും സ്നേഹവും മുറിയിലെത്തിയപ്പോഴുള്ള നഴ്സുമാരുടെ പരിചരണം ഇതൊന്നും മറക്കാനാവാത്തതാണ്. സഹോദരിമാരെ, നിങ്ങളുടെ സേവനം തന്നെയാണ് ലോകത്തിലെ ഏറ്റവും മഹത്വരമായത് എന്ന് ഈ സമയത്ത് ഓർമപ്പെടുതട്ടെ. ഏത് മഹാമാരിക്കും മുന്നിൽ നിന്ന് പട നയിക്കാൻ നിങ്ങളുണ്ടെങ്കിൽ നമ്മളൊരിക്കലും തോൽക്കില്ല. ഇതും നമ്മൾ അതിജീവിക്കുക തന്നെ ചെയ്യുമെന്ന് പറഞ്ഞാണ് സജീഷ് പോസ്റ്റ് അവസാനിപ്പിക്കുന്നത്.
തന്നെ ചികിത്സിച്ച ഡോക്ടർമാർക്ക് നന്ദി പറയുന്ന സജീഷ്, എല്ലാ നഴ്സുമാർക്കും ആശംസകളും നേരുന്നുണ്ട്.
