14ന് തെക്ക് കിഴക്കൻ അറബിക്കടലിൽ പുലർച്ചെയോടെ ന്യൂനമർദ്ദം രൂപപ്പെടുമെന്നാണ് കേന്ദ്ര കലാവസ്ഥ കേന്ദ്രം വ്യക്തമാക്കുന്നത്. ലക്ഷദ്വീപിന് സമീപം വടക്ക് പടിഞ്ഞാറൽ ദിശയിലൂടെയാണ് ന്യൂനമർദ്ദത്തിൻ്റെ സഞ്ചാരപാത. തുടർന്ന് പതിനാറാം തീയതിയോടെ ഈ വർഷത്തെ ആദ്യ ചുഴലിക്കാറ്റായി ഇത് മാറുകയും ചെയ്യുമെന്ന് അധികൃതർ വ്യക്തമാക്കുന്നു. രൂപം കൊള്ളുകയാണെങ്കിൽ മ്യാന്മാർ നൽകിയ ‘ Taukte () എന്ന പേരായിരിക്കും അറിയപ്പെടുക.
ഈ ന്യൂനമർദ്ദത്തിൻ്റെ ഭീഷണി കേരളത്തിന് ഇല്ലെങ്കിലും തീരപ്രദേശങ്ങളിൽ ന്യൂനമർദ്ദം രൂപപ്പെടുന്ന സമയത്ത് തീരപ്രദേശങ്ങളിൽ ശക്തമായ മഴയ്ക്കും കടലാക്രമണത്തിനും സാധ്യതയുണ്ട്. ഈ സാഹചര്യം മുന്നിൽ കണ്ട് ആവശ്യമായ തയ്യാറെടുപ്പുകൾ നടത്തണമെന്ന് ദുരന്ത നിവാരണ അതോറിറ്റി നിർദേശം നൽകി.
മോശം കാലാവസ്ഥയ്ക്കുള്ള സാഹചര്യം നിലനിൽക്കുന്നതിനാൽ കേരള തീരത്ത് നിന്നുള്ള മല്സ്യബന്ധനം 2021 മേയ് 14 മുതല് നിർത്തിവച്ചു. പുതിയ അറിയിപ്പ് ഉണ്ടാകുന്നതുവരെ ഈ നിർദേശം പ്രാബല്യത്തിൽ ഉണ്ടായിരിക്കുമെന്നും ദുരന്ത നിവാരണ അതോറിറ്റി വ്യക്തമാക്കി. നിലവിൽ ആഴക്കടൽ മല്സ്യബന്ധനത്തിൽ തുടരുന്നവർ സുരക്ഷിതമായ സ്ഥലത്തേക്ക് നീങ്ങണം. കാലാവസ്ഥയിലുണ്ടായ ഈ മാറ്റം ആഴക്കടലിൽ മല്സ്യബന്ധനത്തിൽ ഏർപ്പെട്ടിരിക്കുന്നവരെ അധികൃതർ ഉടൻ അറിയിക്കണം.
അറബിക്കടലിൽ ചുഴലിക്കാറ്റ് രൂപമെടുക്കാൻ സാധ്യതയുള്ളതിനാൽ കേരളത്തിലെ വിവിധ ജില്ലകളിൽ ഓറഞ്ച്, യെല്ലോ അലേർട്ടുകൾ പ്രഖ്യാപിച്ചു.
ഓറഞ്ച് അലേർട്ട് പ്രഖ്യാപിച്ച ജില്ലകൾ
മെയ് 14ന് തിരുവനന്തപുരം കൊല്ലം ജില്ലകളിലും മെയ് 15ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ ജില്ലകളിലും ഓറഞ്ച് അലേർട്ട് പ്രഖ്യാപിച്ചു.
യെല്ലോ അലേർട്ട് പ്രഖ്യാപിച്ച ജില്ലകൾ
മെയ് 11ന് ഇടുക്കി മലപ്പുറം ജില്ലകളിലും മെയ് 12ന് ഇടുക്കി ജില്ലയിലും മെയ് 13ന് തിരുവനന്തപുരം ജില്ലയിലും യെല്ലോ അലേർട്ട് പ്രഖ്യാപിച്ചു. മെയ് 14ന് പത്തനംതിട്ട, ആലപ്പുഴ, കോട്ടയം, എറണാകുളം ജില്ലയിലും മെയ് 15ന് കോട്ടയം എറണാകുളം, ഇടുക്കി, തൃശൂർ ജില്ലകളിലും യെല്ലോ അലേർട്ട് പ്രഖ്യാപിച്ചു.
