ഇതുവരെ ആളെ പിടികിട്ടിയില്ലേ? വെളുത്ത ടി ഷർട്ടും, വട്ടത്തിലുള്ള കറുത്ത കണ്ണടയും ധരിച്ച്, വേവിച്ച മാംസത്തിൽ പ്രത്യേക രീതിയിൽ ഉപ്പു വിതറി വിളമ്പുന്ന ഇൻസ്റ്റാഗ്രാമിൽ ചങ്ങാതിയില്ലേ? അത് തന്നെ ആൾ. നുസ്റത്ത് ഗോക്സ് എന്ന പേരിനേക്കാൾ സോൾട്ട് ബേ എന്ന ഇൻസ്റ്റാഗ്രാം പേരിലാണ് ഈ കക്ഷി പ്രശസ്തൻ. ഇപ്പോൾ മനസ്സിലായില്ലേ?
2017 മുതലാണ് സോൾട്ട് ബെയുടെ വിഡിയോകൾ ശ്രദ്ധിക്കപ്പെട്ട് തുടങ്ങിയത്. പിന്നീട് ഇദ്ദേഹത്തിന്റെ പ്രശസ്തി നാൾക്കുനാൾ വർദ്ധിച്ചു. ദുബായ്, ന്യൂയോർക്ക്, സൗദി അറേബ്യ, ഗ്രീസ്, ബോസ്റ്റൺ, ഡാലസ് എന്നിവിടങ്ങളിലെല്ലാം പിന്നീട് സോൾട്ട് ബെയുടെ ഭക്ഷണശാലകൾ ഉയർന്നു. അതെ സമയം, കോവിഡ് -19 സുരക്ഷാ മാനദണ്ഡങ്ങൾ ലംഘിച്ചതിനെ തുടർന്ന് ബോസ്റ്റണിലെ അദ്ദേഹത്തിന്റെ റെസ്റ്റോറന്റ് 2020ൽ പൊതുജനാരോഗ്യ ഉദ്യോഗസ്ഥർ അടച്ചുപൂട്ടാൻ ഉത്തരവിട്ടു. അതിനു പകരമായി യുകെയിൽ ഒരു ഭക്ഷണശാല തുടങ്ങാൻ ഒരുങ്ങുകയാണ് സോൾട്ട് ബേ. ലണ്ടനിൽ തുറക്കുന്ന ഈ പുത്തൻ ഭക്ഷണ ശാലയിലെ ഏറ്റവും വെറൈറ്റി വിഭവം എന്തെന്നോ? 24 കാരറ്റ് സ്വർണ്ണ സ്റ്റീക്ക്.
ഭക്ഷിക്കാവുന്ന സ്വർണമാണ് സ്റ്റീക്കിൽ പൂശുക. സ്വര്ണമായത് കൊണ്ട് വില കുറയില്ല എന്നറിയാമല്ലോ? 700 ഡോളർ വേണം 24 കാരറ്റ് സ്വർണ്ണ സ്റ്റീക്ക് വാങ്ങാൻ. അതായത്, ഏകദേശം അര ലക്ഷം രൂപ പിടിക്കണം. മെയ് 17നാണ് സോൾട്ട് ബേയുടെ ലണ്ടനിലെ പുത്തൻ ഭക്ഷണശാല തുറക്കുക.
