ഇരുപാർട്ടികളേയും രണ്ടായി കണ്ട് മന്ത്രിസ്ഥാനം നൽകാൻ കഴിയാത്തതിനാൽ ലയിക്കണമെന്നായിരുന്നു സിപിഎം നിർദ്ദേശം. നിയമസഭാ തെരഞ്ഞെടുപ്പ് ജയത്തിനു പിന്നാലെ മന്ത്രിസ്ഥാനം ആവശ്യപ്പെട്ട് സിപിഎം നേതാക്കളുമായി എൽജെഡി നേതാക്കൾ ചർച്ച നടത്തിയിരുന്നു. എ വിജയരാഘവൻ, കോടിയേരി ബാലകൃഷ്ണൻ എന്നിവരുമായാണ് ചർച്ച നടത്തിയത്, മനോരമ റിപ്പോർട്ട് ചെയ്തു.
നേതാക്കളുമായി നടത്തിയ ചർച്ചയ്ക്ക് പിന്നാലെയാണ് ലയിക്കാനുള്ള നിർദ്ദേശം സിപിഎം നൽകിയത്. തെരഞ്ഞെടുപ്പിന് മുമ്പും ഇരു പാർട്ടികളോടും ലയിക്കാൻ സിപിഎം നിർദ്ദേശിച്ചിരുന്നു. എൽജെഡി അടക്കം ആറ് ഏകാംഗ കക്ഷികളാണ് മുന്നണിയിലുള്ളത്. ജെഡിഎസും എൽജെഡിയും ലയിച്ചാൽ ശേഷിക്കുന്ന അഞ്ച് പാർട്ടികളേയും പരിഗണിക്കേണ്ടതുണ്ട്.
രാമചന്ദ്രൻ കടന്നപ്പള്ളി (കോൺഗ്രസ് എസ്), കെബി ഗണേഷ് കുമാർ (കേരളാ കോൺഗ്രസ് ബി), അഹമ്മദ് ദേവർക്കോവിൽ (ഐഎൻഎൽ), ആന്റണി രാജു (ജനാധിപത്യ കേരളാകോൺഗ്രസ്), കോവൂർ കുഞ്ഞുമോൻ (ആർഎസ്പി) എന്നിവരാണ് മറ്റ് ഏകാംഗ കക്ഷികൾ.
