ന്യൂഡൽഹി > ഏകരക്ഷിതാവിനും (സിംഗിൾ പേരന്റ്) ഇനി കുട്ടികളെ പരിചരിക്കാനും ദത്തെടുക്കാനും കഴിയുംവിധം മാതൃക ഫോസ്റ്റർ കെയർ മാർഗ്ഗനിർദ്ദേശങ്ങൾ വിപുലപ്പെടുത്തി വനിത ശിശുക്ഷേമ മന്ത്രാലയം. ഏകരക്ഷിതാവിന് പുറമേ വിവാഹം കഴിക്കാത്തവർക്കും വിവാഹബന്ധം നിയമപരമായി വേർപെടുത്തിയവർക്കും, പങ്കാളി മരണപ്പട്ടവർക്കും കുട്ടികളെ പരിചരിക്കാനും ദത്തടുക്കാനും സാധിക്കും. രണ്ടുവർഷത്തെ പരിചരണത്തിന് ശേഷമാണ് ദത്തെടുക്കൽ നടത്താനാവുക. 2016ലെ മാർഗനിർദേശപ്രകാരം ഇത് അഞ്ചുവർഷമായിരുന്നു. ഏകരക്ഷിതാവായ സ്ത്രീയ്ക്ക് ലിംഗഭേദമന്യേ കുട്ടികളെ ദത്തെടുക്കാൻ കഴിയുമെങ്കിൽ ഏകരക്ഷിതാവ് പുരുഷനാണെങ്കിൽ ആൺകുട്ടിയെയാണ് ദത്തെടുക്കാൻ അനുവദിക്കുക. സ്വന്തം മക്കൾ ഉള്ളവർക്കും ഇനി ദത്തെടുക്കാം. പഴയ മാർഗനിർദേശപ്രകാരം നിയമപരമായി വിവാഹം കഴിച്ച ദമ്പതികൾക്ക് മാത്രമായിരുന്നു പരിചരണത്തിനും ദത്തെടുക്കലിനും അനുമതി. 2021-ലെ ജുവനൈൽ ജസ്റ്റിസ് (കെയർ ആൻഡ് പ്രൊട്ടക്ഷൻ ഓഫ് ചിൽഡ്രൻ ) നിയമഭേദഗതി , 2022-ലെ ജുവനൈൽ ജസ്റ്റിസ് (കെയർ ആൻഡ് പ്രൊട്ടക്ഷൻ ഓഫ് ചിൽഡ്രൻ) ഭേദഗതി എന്നിവയുടെ ചുവടുപിടിച്ചാണ് നടപടി. 6–12 വരെയും, 12-18 വയസുകാരെയുമാണ് പരിചരണത്തിനും ദത്തെടുക്കലിനും വിട്ടുനൽകുക.
ദമ്പതികളാണെങ്കിൽ അവർ രണ്ടുവർഷമെങ്കിലും സുസ്ഥിരമായ ദാമ്പത്യം നയിച്ചുവെങ്കിൽ മാത്രമേ പരിചരണത്തിനും ദത്തെടുക്കലിനും അനുമതിയുണ്ടായിരിക്കുവെന്ന പുതിയ വ്യവസ്ഥയും ഉൾപ്പടുത്തി. മുൻചട്ടത്തിൽ ദമ്പതികൾക്ക് 35 വയസ് പൂർത്തിയാകണമെന്ന വ്യവസ്ഥയ്ക്ക് പകരം രണ്ടുപേരുടെയും സംയുക്ത പ്രായം 70 വയസാക്കി. ഏകരക്ഷിതാവിന് 35 വയസ് പൂർത്തിയാകണം. 6 മുതൽ 12 വയസുള്ള കുട്ടികളെ ദത്തെടുക്കുന്ന ഏകരക്ഷിതാവിന്റെ പ്രായപരിധി 55 വയസാണ്. 12-18 വയസുകാരെ ദത്തെടുക്കാൻ 60 വയസാണ് പരിധി. ചൈൽഡ് അഡോപ്ഷൻ റിസോഴ്സ് ഇൻഫർമേഷൻ ആൻഡ് ഗൈഡൻസ് സിസ്റ്റം (കെയറിങ്സ്) വഴി ഓൺലൈനായാണ് അപേക്ഷ നൽകേണ്ടത്. 2024 മാർച്ച് വരെ 1,653 കുട്ടികൾ വിവിധ സംസ്ഥാനങ്ങളിലെ പരിചരണകേന്ദ്രങ്ങളിൽ കഴിയുന്നുണ്ടന്നാണ് മന്ത്രാലയത്തിന്റെ കണക്ക്. 2022 സെപ്റ്റംബർ മുതൽ ഈ വർഷം ജൂലൈ 31 വരെ രണ്ട് വർഷത്തെ പരിചരണത്തിന് ശേഷം 23 കുട്ടികളെ വിവിധ കുടുംബങ്ങൾ ദത്തെടുത്തു.
