ക്രിക്കറ്റ് ഇതിഹാസം സച്ചിൻ ടെണ്ടുൽക്കറുടെ 51ാം പിറന്നാൾ ദിനമായിരുന്നു വ്യാഴാഴ്ച. ഏറെ വ്യത്യസ്തമായ രീതിയിലാണ് ലിറ്റിൽ മാസ്റ്റർ ഇക്കുറി തന്റെ പിറന്നാൾ ആഘോഷിച്ചത്. മുംബൈയിലെ ഒരു കൂട്ടം പെൺകുട്ടികൾക്കൊപ്പം ഫുട്ബോൾ കളിച്ചാണ് സച്ചിൻ തന്റെ പിറന്നാൾ ദിനം വേറിട്ടതാക്കിയത്. ഈ വീഡിയോ സമൂഹമാധ്യമങ്ങളിൽ സച്ചിൻ പങ്കുവയ്ക്കുകയും ചെയ്തു.
സച്ചിനൊപ്പം ഭാര്യ അഞ്ജലിയും ഉണ്ടായിരുന്നു. പിന്നാലെ കുട്ടികൾക്ക് തണ്ണീർമത്തനും മറ്റ് പഴവർഗങ്ങളും സച്ചിൻ വിതരണം ചെയ്തു. സച്ചിൻ ടെണ്ടുൽക്കർ ഫൗണ്ടേഷനുമായി ചേർന്നാണ് ഈ പ്രവർത്തനങ്ങൾ നടന്നത്. കുട്ടികൾക്കൊപ്പമുള്ള അനുഭവങ്ങളും സച്ചിൻ സമൂഹമാധ്യമങ്ങളിൽ പങ്കുവെച്ചു.
“ഫുട്ബോൾ കളിക്കുന്നത് തനിക്ക് ഏറെ സന്തോഷമുള്ള കാര്യമാണ്. മികച്ച ഒരു കൂട്ടം കുട്ടികളോടൊപ്പം താൻ ഫുട്ബോൾ കളിക്കുകയും പിറന്നാൾ ആഘോഷിക്കുകയും ചെയ്തു. തന്റെ പിറന്നാളിന് ആദ്യം നന്മകൾ നേർന്നത് ഈ പെൺകുട്ടികളാണ്,” സച്ചിൻ കുറിച്ചു.