ഇതാണ് കോഹ്ലി ചേട്ടന്റെ സ്നേഹം; സർപ്രൈസ് സമ്മാനവുമായി റിങ്കുവിനെ ഞെട്ടിച്ച് വിരാട്

ഐപിഎല്ലിൽ കഴിഞ്ഞ മത്സരത്തിൽ കൊൽക്കത്ത നൈറ്റ് റൈഡേഴ്സിനോട് തോറ്റെങ്കിലും ബെംഗളൂരു താരം വിരാട് കോഹ്ലി പ്രകടിപ്പിച്ച സ്പോർട്സ്മാൻ സ്പിരിറ്റ് ശ്രദ്ധേയമാകുന്നു. മത്സരത്തിന് ശേഷം കൊൽക്കത്തയുടെ ഫിനിഷറായ റിങ്കു സിങ്ങിനെ ആർസിബിയുടെ ഡ്രസ്സിങ് റൂമിലേക്ക് വിളിപ്പിച്ചിരുന്നു ഇന്ത്യൻ ലെജൻഡ്. മത്സരത്തിൽ 83 റൺസെടുത്ത് കോഹ്ലി ആർസിബിക്ക് മികച്ച സ്കോർ സമ്മാനിച്ചെങ്കിലും ഷാരൂഖ് ഖാന്റെ ടീം അത് അനായാസം മറികടന്നു.

ഏഴ് വിക്കറ്റിന്റെ തകർപ്പൻ ജയമാണ് കൊൽക്കത്ത നേടിയത്. മത്സരത്തിൽ റിങ്കു സിങ്ങിനും കാര്യമായി ഒന്നും ചെയ്യാനുണ്ടായിരുന്നില്ല. അഞ്ച് പന്തിൽ നിന്നും അഞ്ച് റൺസ് നേടിയ താരം പുറത്താകാതെ മത്സരം ജയിപ്പിച്ചിരുന്നു. മത്സരത്തിന് ശേഷം ഇന്ത്യൻ യുവതാരത്തിന് ഒരു ക്രിക്കറ്റ് ബാറ്റ് സമ്മാനിച്ചിരിക്കുകയാണ് വിരാട് കോഹ്ലി. ഇക്കാര്യം റിങ്കു സിങ് തന്നെയാണ് ഇൻസ്റ്റഗ്രാം സ്റ്റോറിയിലൂടെ ഇക്കാര്യം പുറംലോകത്തെ അറിയിച്ചത്.

“ഉപദേശങ്ങൾക്കും ബാറ്റ് സമ്മാനം തന്നതിനും നന്ദിയുണ്ട് വിരാട് കോഹ്ലി ചേട്ടാ,” എന്നായിരുന്നു റിങ്കു സ്റ്റോറിയിൽ കുറിച്ചത്. വിരാട് കോഹ്ലിയെ ടാഗ് ചെയ്ത് സ്മൈലികളും ഇതോടൊപ്പം ചേർത്തിട്ടുണ്ട്. റിങ്കുവിനെ കോഹ്ലി കെട്ടിപ്പിടിക്കുന്ന ചിത്രവും ഇതോടൊപ്പം ചേർത്തിട്ടുണ്ട്.

Rinku Singh thanking Virat Kohli for the gift. 👌
– Kohli is always there for youngsters. pic.twitter.com/p23y7ZHFj8
— Johns. (@CricCrazyJohns) March 30, 2024

ഈ ചിത്രങ്ങൾ അതിവേഗം സോഷ്യൽ മീഡിയയിൽ വൈറലായിട്ടുണ്ട്. കൊൽക്കത്ത നൈറ്റ് റൈഡേഴ്സും ആർസിബിയും ഒഫീഷ്യൽ സോഷ്യൽ മീഡിയ പേജുകളിൽ ഈ ചിത്രങ്ങൾ പങ്കുവച്ചിട്ടുണ്ട്.