സച്ചിൻ ബേബിയും പിള്ളേരും ഡബിൾ സ്ട്രോങ്ങാ; ജയപ്രതീക്ഷയിൽ മല്ലു ബോയ്സ്

ആന്ധ്രയ്‌ക്കെതിരെ അവസാന രഞ്ജി ട്രോഫി ക്രിക്കറ്റ് പോരാട്ടത്തിൽ കൂറ്റന്‍ ഒന്നാം ഇന്നിങ്സ് ലീഡ് സ്വന്തമാക്കിയ കേരളത്തിന് ജയപ്രതീക്ഷ. ആന്ധ്രയുടെ ഒന്നാം ഇന്നിങ്സ് സ്കോറായ 272 റണ്‍സിന് മറുപടിയായി മൂന്നാം ദിനം കേരളം ഏഴ് വിക്കറ്റ് നഷ്ടത്തില്‍ 514 റണ്‍സെടുത്ത് ഇന്നിങ്സ് ഡിക്ലയര്‍ ചെയ്തു. 242 റണ്‍സിന്‍റെ കൂറ്റൻ ഒന്നാം ഇന്നിങ്സ് ലീഡ് നേടിയ കേരളം രണ്ടാം ഇന്നിങ്സില്‍ 19 റണ്‍സെടുക്കുന്നതിനിടെ ആന്ധ്രയുടെ ഓപ്പണര്‍ രേവന്ദ് റെഡ്ഡിയെ മടക്കി ജയപ്രതീക്ഷയിലാണ്.

അവസാന ദിനം 9 വിക്കറ്റ് ശേഷിക്കെ ഇന്നിങ്സ് തോല്‍വി ഒഴിവാക്കാന്‍ ആന്ധ്രയ്ക്ക് ഇനിയും 223 റണ്‍സ് കൂടി വേണം. മഹീപ് കുമാറും (8) അശ്വിന്‍ ഹെബ്ബാറുമാണ് (2) ക്രീസില്‍. എന്‍.പി. ബേസിലാണ് രേവന്ദ് റെഡ്ഡിയെ പുറത്താക്കി കേരളത്തിന് നിര്‍ണായക മുൻതൂക്കം സമ്മാനിച്ചത്. 258/3 എന്ന നിലയില്‍ മൂന്നാം ദിനം ക്രീസിലിറങ്ങിയ കേരളത്തിനായി സച്ചിന്‍ ബേബിയാണ് (113) ആദ്യം സെഞ്ചുറി നേടിയത്. മനീഷ് ഗോല്‍മാരുവിന്‍റെ പന്തില്‍ സച്ചിനെ കെ നിതീഷ് കുമാര്‍ ക്യാച്ചെടുത്ത് പുറത്താക്കി.

സച്ചിന്‍ പുറത്തായ ശേഷം അക്ഷയ് ചന്ദ്രനും (184) സല്‍മാന്‍ നിസാറും( 58) ചേര്‍ന്നാണ് കേരളത്തെ സുരക്ഷിത സ്കോറിലേക്ക് നയിച്ചത്. 386 പന്തില്‍ 20 ബൗണ്ടറികള്‍ പറത്തിയാണ് അക്ഷയ് ചന്ദ്രന്‍ 184 റണ്‍സടിച്ചത്. ഇരുവരും പുറത്തായ ശേഷം മുഹമ്മദ് അസ്ഹറുദ്ദീന്‍ 41 പന്തില്‍ 40 റണ്‍സെടുത്ത് കേരളത്തിന്റെ സ്കോറുയര്‍ത്തി. രണ്ട് റണ്‍സുമായി അഖിസ്‍ സ്കറിയ പുറത്താകാതെ നിന്നു. ആന്ധ്രയ്ക്ക് വേണ്ടി മനീഷ് ഗോലമാരു 4 വിക്കറ്റെടുത്തു.

നോക്കൗട്ട് പ്രതീക്ഷകള്‍ ഏതാണ്ട് അവസാനിച്ച കേരളം കഴിഞ്ഞ മത്സരത്തില്‍ ബംഗാളിനെ തകര്‍ത്ത് സീസണിലെ ആദ്യ ജയം നേടിയിരുന്നു. അതേസമയം, സെഞ്ചുറി പ്രകടനത്തോടെ കേരള ടീമിന്റെ ക്യാപ്ടൻ സച്ചിന്‍ ബേബി രഞ്ജി സീസണിലെ റണ്‍വേട്ടയില്‍ രണ്ടാം സ്ഥാനത്തേക്കുയര്‍ന്നു. ഏഴ് മത്സരങ്ങളില്‍ 4 സെഞ്ചുറിയും 4 ഫിഫ്റ്റിയും അടക്കം 822 റണ്‍സാണ് ഈ സീസണില്‍ സച്ചിന്‍ അടിച്ചെടുത്തത്. 860 റണ്‍സടിച്ച റിക്കി ഭൂയി മാത്രമാണ് റണ്‍വേട്ടയില്‍ സച്ചിന് മുന്നിലുള്ള ഏക താരം.