ഫുട്ബോൾ മത്സരത്തിനിടെ ഇടിമിന്നലേറ്റ് ഇന്തോനേഷ്യൻ ഫുട്ബോൾ താരത്തിന് ദാരുണാന്ത്യം. സെപ്‌റ്റൈൻ രഹർജ എന്ന ഫുട്ബോൾ താരമാണ് കഴിഞ്ഞ ദിവസം മിന്നലേറ്റ് മരിച്ചത്. 35 വയസായിരുന്നു. ഇക്കഴിഞ്ഞ ശനിയാഴ്ച വൈകിട്ട് നടന്ന ഞെട്ടിക്കുന്ന സംഭവത്തിന്റെ വീഡിയോ ഇപ്പോഴാണ് സാമൂഹിക മാധ്യമങ്ങളിൽ വൈറലാവുകയാണ്.
വെസ്റ്റ് ജാവയിലെ ബന്ദൂങ്ങിലെ സിലിവാങ്ങി സ്റ്റേഡിയത്തിൽ നടന്ന സൗഹൃദ മത്സരത്തിനിടെയാണ് ഫുട്ബോൾ താരത്തിന് മിന്നലേൽക്കുന്നത്. ബന്ദൂങ് എഫ്.സിയും എഫ്.ബി.ഐ സുബാങ്ങും തമ്മിലുള്ള മത്സരത്തിനിടെയാണ് ദാരുണ സംഭവം.
മഞ്ഞ നിറത്തിലൊരു പ്രകാശം താരത്തിനേൽക്കുന്നതും സഹതാരങ്ങൾ കാഴ്ച വിശ്വസിക്കാനാകാതെ നിൽക്കുന്നതും വീഡിയോയിൽ നിന്ന് വ്യക്തമാണ്. മറ്റു കളിക്കാരെല്ലാം ഭയന്നു മാറി നിൽക്കുമ്പോൾ കൂട്ടത്തിലൊരു കളിക്കാരൻ മാത്രമാണ് രഹർജയുടെ സമീപത്തേക്ക് ഓടിയെത്തുന്നത്.
Footballer (soccer) dead after being struck by lightning during a match in Indonesia
The man, later identified as Septain Raharja(35), was competing in a friendly football match between 2 FLO FC Bandung and FBI Subang, when lightning struck him at around 4:20pm local time on… pic.twitter.com/rAzB0rHCVi
— Global Dissident (@GlobalDiss) February 12, 2024
മിന്നലേറ്റ് വീണ സെപ്‌റ്റൈൻ രഹർജയെ ഉടൻ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. രഹർജയ്ക്ക് മിന്നലേൽക്കുന്നതിന്റെ ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്.
കഴിഞ്ഞ വർഷം സമാനമായൊരു സംഭവം കിഴക്കൻ ജാവയിലെ ബോജോനെഗോറോയിൽ നടന്നിരുന്നു. എന്നാൽ ഉടനെ ചികിത്സ ലഭ്യമാക്കാൻ കഴിഞ്ഞതോടെ ജീവൻ രക്ഷിക്കാൻ കഴിഞ്ഞു.
