ത്രില്ലടിച്ച് സൂപ്പർ താരങ്ങൾ; ഇന്ത്യൻ താരങ്ങളുടെ ആഘോഷ വീഡിയോ വൈറൽ

കേപ്ടൗണിൽ ദക്ഷിണാഫ്രിക്കയ്ക്കെതിരായ രണ്ടാമത്തേയും അവസാനത്തേയുമായ ടെസ്റ്റിൽ ചരിത്രവിജയമാണ് ഇന്ത്യ നേടിയത്. ഏറ്റവും കുറഞ്ഞ ഓവറുകൾക്കകം മത്സരം ജയിക്കാൻ ടീമിനായിരുന്നു. ബാറ്റ്സ്മാൻമാരുടെ ശവപ്പറമ്പായ കേപ്ടൗണിലെ പിച്ചിൽ ഇന്ത്യ ഏഴ് വിക്കറ്റിന്റെ തിളക്കമാർന്ന ജയമാണ് നേടിയത്.

ഏറെ ആഹ്ളാദത്തോടെ വിരാട് കോഹ്ലിയെ വാരിപ്പുണരുന്ന രാഹുൽ ദ്രാവിഡിന്റേയും ത്രില്ലടിച്ചിരിക്കുന്ന യുവതാരങ്ങളുടേയും വൈകാരികമായ നിമിഷങ്ങളാണ് ഈ വീഡിയോയുടെ ഹൈലൈറ്റ്. ഇന്ത്യയുടെ യഥാർത്ഥ വിജയശിൽപ്പികളായ ജസ്പ്രീത് ബുംറയും മുഹമ്മദ് സിറാജും സന്തോഷം പങ്കിടുന്നതും കാണാം.

മത്സര ശേഷം ഈ പരമ്പരയോടെ ടെസ്റ്റ് ക്രിക്കറ്റിൽ നിന്ന് വിരമിച്ച ദക്ഷിണാഫ്രിക്കൻ നായകൻ ഡീൻ എൽഗറിന് സ്നേഹസമ്മാനം നൽകാനും ഇന്ത്യൻ ക്യാമ്പ് തയ്യാറായി. സീനിയർ താരങ്ങളായ വിരാട് കോഹ്ലിയും ക്യാപ്റ്റൻ രോഹിത് ശർമ്മയും, ഒപ്പിട്ട കോഹ്ലിയുടെ പേരുള്ള 18ാം നമ്പർ ജേഴ്സി ദക്ഷിണാഫ്രിക്കൻ നായകന് കൈമാറി.

Starting the New Year with a historic Test win at Newlands 👌👌
📽️ Relive all the moments here 🔽#TeamIndia | #SAvIND pic.twitter.com/xbpMGBXjxR
— BCCI (@BCCI) January 5, 2024

വിരാടിനെ കെട്ടിപ്പിടിച്ച് അഭിനന്ദിച്ചാണ് എൽഗർ നന്ദിയറിയിച്ചത്. സെഞ്ചൂറിയനിൽ നടന്ന ആദ്യ ടെസ്റ്റിൽ എൽഗറിന്റെ സെഞ്ചുറി കരുത്തിലാണ് ദക്ഷിണാഫ്രിക്ക അനായാസ ജയം നേടിയത്. ഈ പ്രകടനത്തിന്റെ കരുത്തിൽ ജസ്പ്രീത് ബുംറയ്ക്കൊപ്പം പരമ്പരയുടെ താരമായും അദ്ദേഹം തിരഞ്ഞെടുക്കപ്പെട്ടു. മുഹമ്മദ് സിറാജാണ് ഈ മത്സരത്തിലെ താരമായി മാറിയത്.