തന്റെ 35ാം പിറന്നാൾ ദിനത്തിൽ കരുത്തരായ ദക്ഷിണാഫ്രിക്കൻ ടീമിനെതിരെ തകർപ്പൻ പ്രകടനം പുറത്തെടുത്ത് വിരാട് കോഹ്ലി. ഏകദിന ക്രിക്കറ്റിൽ തന്റെ 71ാം അർധസെഞ്ചുറിയാണ് താരം കണ്ടെത്തിയത്. മൂന്നാം വിക്കറ്റിൽ ശ്രേയസ് അയ്യർക്കൊപ്പം ചേർന്ന് ഇന്ത്യയ്ക്കായി മികച്ച കൂട്ടുകെട്ടാണ് കോഹ്ലി പടുത്തുയർത്തിയത്. പവർപ്ലേയിൽ രോഹിത് ശർമ്മ സമ്മാനിച്ച മിന്നുന്ന തുടക്കം മുതലെടുത്ത് കരുതലോടെയാണ് ബർത്ത് ഡേ ബോയ് ഇന്നിംഗ്സ് ആരംഭിച്ചത്.
ഏഴ് ബൌണ്ടറികൾ സഹിതമാണ് കോഹ്ലി 68 റൺസിലേക്ക് കുതിച്ചെത്തിയത്. ഇന്നിംഗ്സിൽ അതുവരെ കൂറ്റനടികളൊന്നും പിറന്നിരുന്നില്ല. ശ്രേയസ് അയ്യർ രണ്ട് സിക്സറുകൾ പറത്തിയപ്പോഴും കോഹ്ലി കരുതലോടെയാണ് ബാറ്റു വീശിയത്. അർധസെഞ്ചുറിക്ക് ശേഷവും 80നോടടുത്ത് സ്ട്രൈക്ക് റേറ്റിലാണ് താരം റൺ കണ്ടെത്തിയത്. വിരാട് പിറന്നാൾ ദിവസം സെഞ്ചുറി നേടുമെന്ന ഉറച്ച പ്രതീക്ഷയിലാണ് ആരാധകർ.
37ാം ഓവറിലാണ് ശ്രേയസ് അയ്യർ പുറത്താകുന്നത്. 87 പന്തിൽ 77 റൺസെടുത്താണ് അയ്യർ പുറത്തായത്. മൂന്നാം വിക്കറ്റിൽ 158 പന്തിൽ നിന്ന് 134 റൺസാണ് ഇരുവരും കൂട്ടിച്ചേർത്തത്.പിന്നീട് കെഎൽ രാഹുലിനൊപ്പം ചേർന്ന് കോഹ്ലി ഇന്നിംഗ്സിനെ മുന്നോട്ടേക്ക് നയിച്ചു. തുടക്ക ഓവറുകളിൽ ധാരാളം റൺസ് വഴങ്ങിയ ദക്ഷിണാഫ്രിക്കൻ ബൌളർമാരും പിന്നീട് കണിശതയോടെയാണ് പന്തെറിഞ്ഞത്.
Read Similar Sports Stories
