തിരുവനന്തപുരം
നുറുകണക്കിനാളുകളെ കൂട്ടക്കൊലചെയ്ത്, ഗാസയിലെ ആശുപത്രിയിൽ ഇസ്രായേൽ നടത്തിയ ബോംബാക്രമണത്തിൽ ശക്തമായി പ്രതിഷേധിക്കണമെന്ന് സിപിഐ എം സംസ്ഥാന സെക്രട്ടറിയറ്റ്. സാധാരണ മനുഷ്യരെ കൊന്നൊടുക്കുന്നത് സമാധാനപരമായി പ്രശ്നങ്ങൾ പരിഹരിക്കുന്നതിന് തടസ്സം സൃഷ്ടിക്കുകയേയുള്ളൂ. അന്താരാഷ്ട്ര ധാരണകളെയെല്ലാം കാറ്റിൽ പറത്തി ഗാസയിലെ ആശുപത്രിയിൽ ഇസ്രയേൽ നടത്തിയ ബോംബാക്രമണം അത്തരമൊരു സാഹചര്യമാണ് സൃഷ്ടിച്ചിട്ടുള്ളത്. പരിഷ്കൃത സമൂഹത്തിന് ഒരിക്കലും അംഗീകരിക്കാൻ കഴിയാത്ത പൈശാചിക നടപടിയാണിത്. നേരത്തെത്തന്നെ കടുത്ത ഉപരോധം കാരണം വെള്ളവും വെളിച്ചവും ഭക്ഷണവും ഇല്ലാതായിത്തീർന്ന ജനതയ്ക്ക് നേരെയാണ് ഇത്തരമൊരു ആക്രമണം.
ഗാസാ മുനമ്പിൽ കഴിഞ്ഞ കുറച്ച് നാളുകളിലായി തുടർച്ചയായ ആക്രമണങ്ങൾ നടത്തുകയാണ് ഇസ്രയേൽ. ഇതിന് തിരിച്ചടി എന്ന നിലയിലാണ് ഹമാസ് ഇസ്രയേലിൽ ആക്രമണം നടത്തിയത്. ഇസ്രയേലും ഹമാസും സംഘർഷം അവസാനിപ്പിച്ച് പലസ്തീന് അർഹതപ്പെട്ട രാജ്യം നൽകുന്നതിനുള്ള അന്താരാഷ്ട്ര സമ്മർദം ഉയർന്നുവരണമെന്ന ചിന്തകൾ ലോകത്ത് വളർന്നുകൊണ്ടിരിക്കുന്ന ഘട്ടത്തിലാണ് ഈ ദാരുണ സംഭവം.
ഈ നരഹത്യക്കെതിരെ ലോകത്തെമ്പാടും ശക്തമായ പ്രതിഷേധം ഉയരുന്നതോടൊപ്പം ജനാധിപത്യ കേരളത്തിന്റെ പ്രതിഷേധവും ഉയരേണ്ടതുണ്ടെന്നും പ്രസ്താവനയിൽ പറഞ്ഞു.
