കുന്നംകുളം > ട്രാക്കിലെ ഒറ്റലാപ്പ് പോരിന് റെക്കോഡിന്റെ തിളക്കം. സീനിയർ ആൺകുട്ടികളുടെ 400 മീറ്ററിൽ മാത്തൂർ സിഎഫ്ഡി സ്കൂളിലെ പി അഭിരാം റെക്കോഡോടെ സ്വർണം നേടിയപ്പോൾ പെൺകുട്ടികളിൽ എം ജ്യോതിക 55.89 സെക്കൻഡിൽ സ്വർണമണിഞ്ഞു. പറളി എച്ച്എസ്എസിലെ വിദ്യാർഥിയായ ജ്യോതിക 400 മീറ്റർ ഹർഡിൽസിലും 200 മീറ്ററിലും മത്സരിക്കുന്നുണ്ട്. കല്ലേക്കാട് തത്ത്വമസിയിൽ ജി മണികണ്ഠന്റെയും- പി ആർ സജിതയുടെയും മകളാണ്. പൂവമ്പായി എഎംഎച്ച്എസിലെ ശാരിക സുനിൽകുമാറിനാണ് വെള്ളി. തിരുവനന്തപുരം സായിയുടെ സാന്ദ്രമോൾ സാബു മൂന്നാമതായി.
ജൂനിയർ പെൺകുട്ടികളിൽ കൊല്ലം ക്രിസ്തുരാജ് എച്ച്എസ്എസിലെ കസ്തൂർബ പി പ്രസാദ് 58.96 സെക്കൻഡിൽ സ്വർണം നേടി. എറണാകുളം കാക്കയൂർ പുഞ്ചക്കരയിൽ വി കെ പ്രസാദിന്റെയും എസ് സജിതയുടെയും മകളാണ്. ആലപ്പുഴ സെന്റ് ജോസഫ്സ് സ്കൂളിലെ ആർ ശ്രേയ വെള്ളി നേടി. ബാലുശേരി ജിജിഎച്ച്എസ്എസിലെ എലിസബത്ത് സിബി വെങ്കലം സ്വന്തമാക്കി. ജൂനിയർ ആൺകുട്ടികളിൽ പാല സെന്റ് തോമസിലെ മുഹമ്മദ് സ്വാലിഹ് 50.53 സെക്കൻഡിൽ സ്വർണമണിഞ്ഞു. കൊല്ലം നിലമേൽ ചരുവിള പുത്തൻവീട്ടിൽ സുലൈമാന്റെയും ഷംലയുടെയും മകനാണ്. ജിവി രാജയിലെ മുഹമ്മദ് അഷ്ഫഖ് വെള്ളിയും മാത്തൂർ സ്കൂളിലെ കെ അഭിജിത് വെങ്കലവും സ്വന്തമാക്കി.
സബ് ജൂനിയർ പെൺകുട്ടികളിൽ പാലക്കാട് മണ്ണിയംങ്കോട് എയുപി സ്കൂളിലെ പി നിഖിത സ്വർണം നേടി. മൊറയൂർ വിഎച്ച്എംഎച്ച്എസിലെ സി ഷൻസ രണ്ടും കണ്ണൂർ ജിവിഎച്ച്എസ്എസിലെ വൈഗ പ്രജീഷ് മൂന്നും സ്ഥാനം നേടി. സബ് ജൂനിയർ ആൺകുട്ടികളിൽ കല്ലടി കുമരംപുത്തൂർ എച്ച്എസ്എസിലെ അർഷാദ് അലി ഒന്നാമതായി. മണിപ്പുരിലെ ഇംഫാൽ സ്വദേശിയാണ്. മുതലമട ജിഎച്ച്എസ്എസിലെ ആർ അർജുൻ രണ്ടാമതെത്തി. പുന്നപ്ര സെന്റ് ജോസഫ്സിലെ പി ബി ഫെബിൻ മൂന്നാംസ്ഥാനം നേടി.
