കൊച്ചി> പുതിയ കാര്യങ്ങളൊന്നും അറിയാത്തതുകൊണ്ട്, തെറ്റായ വിവരത്തിന്റെ അടിസ്ഥാനത്തിലാണ് പി എം എ സലാം സമസ്തയ്ക്കെതിരെ പറഞ്ഞതെന്ന് മുസ്ലിംലീഗ് ദേശീയ ജനറൽ സെക്രട്ടറി പി കെ കുഞ്ഞാലിക്കുട്ടി എംപി. സമസ്ത-യുമായുള്ള പ്രശ്നങ്ങൾ അവസാനിച്ചു.
സമസ്ത-–-ലീഗ് തർക്കത്തിൽ സാദിഖലി ശിഹാബ് തങ്ങളും ജിഫ്രി മുത്തുക്കോയ തങ്ങളും അന്തിമമായി കാര്യങ്ങൾ പറഞ്ഞുകഴിഞ്ഞുവെന്നും ഇക്കാര്യത്തിൽ പ്രസ്താവന വേണ്ടെന്ന് നേതാക്കളോട് നിർദേശിച്ചതായും കുഞ്ഞാലിക്കുട്ടി പറഞ്ഞു.
കാര്യങ്ങൾ പറഞ്ഞാൽ പിന്നീട് പ്രസ്താവന നടത്താതിരിക്കുന്നതാണ് മുസ്ലിംലീഗിന്റെ രീതി. അത് എല്ലാവരും പാലിക്കണം. സമസ്തയും ലീഗും തമ്മിലുള്ള തർക്കം പുതിയതല്ല. എല്ലാ കാലത്തും ഉണ്ടായിട്ടുണ്ട്. എന്നാൽ, കാലികവിഷയങ്ങളിൽ സംഘടനകൾ ഒരുമിച്ചുനിൽക്കും. മതപരമായ കാര്യങ്ങളിൽ സമസ്തയുടെ അഭിപ്രായമാണ് സ്വീകരിക്കുക. സമസ്തയിലുള്ളവരാണ് ലീഗിൽ ഭൂരിപക്ഷവും.
പി എം എ സലാമിനെതിരെ സമസ്ത നൽകിയ പരാതിയെക്കുറിച്ചുള്ള ചോദ്യത്തിന് അതൊക്കെ കഴിഞ്ഞ കാര്യങ്ങളെന്നായിരുന്നു മറുപടി.
