കൊലാലംപുർ
മെർദേക്ക കപ്പ് ഫുട്ബോൾ സെമിയിൽ ഇന്ത്യ ഇന്ന് ആതിഥേയരായ മലേഷ്യയോട്. കൊലാലംപുരിലെ ബുകിറ്റ് ജലീൽ സ്റ്റേഡിയത്തിൽ വൈകിട്ട് 6.30നാണ് മത്സരം. യൂറോസ്പോർട് ചാനലിലും ഇന്ത്യൻ ഫുട്ബോൾ അസോസിയേഷൻ യു ട്യൂബ് ചാനലിലും കളി കാണാം.
മിനി ഏഷ്യാകപ്പ് എന്നുപേരുള്ള ഈ ടൂർണമെന്റിൽ ഇക്കുറി മൂന്ന് ടീംമാത്രമാണ്. പലസ്തീൻ പിന്മാറി. ഇതോടെ മറ്റൊരു ടീമായ തജിക്കിസ്ഥാൻ ഫൈനലിൽ കടന്നു. ഇന്ന് ജയിക്കുന്ന ടീം 17ന് തജിക്കിസ്ഥാനുമായി ഫൈനൽ കളിക്കും. ഏഷ്യൻ ഗെയിംസിൽ പ്രീ ക്വാർട്ടറിൽ സൗദി അറേബ്യയോട് തോറ്റാണ് ഇഗർ സ്റ്റിമച്ചിന്റെ സംഘം പുറത്തായത്.
