തിരുവനന്തപുരം
ദേശീയപാത 66ന്റെ ഭാഗമായ മുക്കോല–– കാരോട് ഉൾപ്പെടെ സംസ്ഥാനത്തെ നാല് പദ്ധതി അടുത്തയാഴ്ച നാടിന് സമർപ്പിക്കും. നീലേശ്വരം റെയിൽവേ മേൽപ്പാലം, ചെറുതോണി പാലം, നവീകരിച്ച മൂന്നാർ-– ബോഡിമെട്ട് ദേശീയപാത എന്നിവയാണ് മറ്റ് പദ്ധതികൾ. ഉദ്ഘാടനത്തിന് കേന്ദ്രമന്ത്രി നിതിൻ ഗഡ്കരി എത്തിയേക്കും. തിരുവനന്തപുരത്ത് ചടങ്ങ് നടത്താനാണ് സാധ്യത.
43 കിലോമീറ്ററുള്ള കഴക്കൂട്ടം–- കാരോട് ബൈപാസിലെ 16.05 കിലോമീറ്ററിലുള്ള കോൺക്രീറ്റ് റോഡാണ് മുക്കോല– കാരോട് പാത. സംസ്ഥാനത്തെ ഏറ്റവും നീളംകൂടിയ കോൺക്രീറ്റ് പാതയാണിത്. 2018-ൽ പി കരുണാകരൻ എംപി ആയിരിക്കുമ്പോഴാണ് നീലേശ്വരം മേൽപ്പാലം നിർമാണം ആരംഭിച്ചത്. പാലത്തിനായി സിപിഐ എം നേതൃത്വത്തിൽ പ്രക്ഷോഭങ്ങളും സംഘടിപ്പിച്ചിരുന്നു. 780 മീറ്റർ നീളവും 45 മീറ്റർ വീതിയുമുള്ള പാലം 64.44 കോടി രൂപ ചെലവിലാണ് നിർമിച്ചത്. കൊച്ചി-– ധനുഷ്കോടി ദേശീയപാതയുടെ ഭാഗമാണ് 42 കിലോമീറ്റർ വരുന്ന മൂന്നാർ– -ബോഡിമെട്ട് റീച്ച്. 382 കോടി ചെലവിൽ 2017ലാണ് നവീകരണം ആരംഭിച്ചത്. 2018ലെ പ്രളയത്തിൽ ഒരുവശം തകർന്നതോടെയാണ് ചെറുതോണിയിൽ പുതിയ പാലവും റോഡും നിർമിച്ചത്. സംരക്ഷണഭിത്തിക്ക് 38 കോടിയും പാലത്തിന് 25 കോടിയും അനുവദിച്ചു. 40 മീറ്റർ ഉയരത്തിൽ മൂന്ന് സ്പാനിൽ നിർമിച്ച പാലത്തിന് 120 മീറ്ററാണ് നീളം. ദേശീയപാത പദ്ധതിക്കായി ഭൂമിയേറ്റെടുക്കൽ തുകയുടെ 25 ശതമാനം സംസ്ഥാനമാണ് വഹിച്ചത്. ഇതിനിടെ കൊച്ചി – ധനുഷ്കോടി ദേശീയപാതയിലെ മൂവാറ്റുപുഴ, കോതമംഗലം ബൈപാസുകൾക്ക് കേന്ദ്രം 1720 കോടി രൂപ അനുവദിച്ചു.
