കൊച്ചി
അമേരിക്കയിൽനിന്ന് എത്തിയ കൊറിയറിൽനിന്ന് 123 എൽഎസ് ഡി സ്റ്റാമ്പുകൾ പിടിച്ചെടുത്തു. 1.41 ഗ്രാം സ്റ്റാമ്പുകളാണ് കൊച്ചിയിലെ വിദേശ പോസ്റ്റ് ഓഫീസിനൊപ്പം പ്രവർത്തിക്കുന്ന കസ്റ്റംസ് സ്പെഷ്യൽ ഇന്റലിജൻസ് ആൻഡ് ഇൻവെസ്റ്റിഗേഷൻ സംഘം പിടിച്ചെടുത്തത്. കൊറിയർ കൈപ്പറ്റാനെത്തിയ നായരമ്പലം സ്വദേശി ചന്തു പുരുഷോത്തമനെ (30) അറസ്റ്റ് ചെയ്തു. ബിടെക്കുകാരനായ ഇയാൾ, കൊച്ചിയിലെ സ്വകാര്യസ്ഥാപനത്തിലെ ജീവനക്കാരനാണ്.
ചന്തു കൊറിയർ ഓർഡർ ചെയ്തതിന്റെ ഡിജിറ്റൽ തെളിവുകൾ ലഭിച്ചതായി കസ്റ്റംസ് പറഞ്ഞു. ലഹരിയിടപാട് സംബന്ധിച്ച് തെളിവുലഭിച്ചതായും സൂചനയുണ്ട്. അമേരിക്കയിൽനിന്ന് അയച്ച കൊറിയർ ശനിയാഴ്ചയാണ് പോസ്റ്റ് ഓഫീസിലെത്തിയത്. സംശയം തോന്നിയ ഉദ്യോഗസ്ഥർ കസ്റ്റംസിനെ അറിയിച്ചു. തുടർന്ന് കൊറിയർ കൈപ്പറ്റാനെത്തിയ ചന്തുവിനെ ഇന്റലിജൻസ് ഓഫീസർമാരുടെ നേതൃത്വത്തിൽ പിടികൂടി. കോടതി റിമാൻഡ് ചെയ്തു.
എൽഎസ്ഡി സ്റ്റാമ്പ് 0.1 ഗ്രാം കൈവശം വയ്ക്കുന്നതുപോലും 10 വർഷം തടവ് കിട്ടാവുന്ന കുറ്റമാണ്. വിദേശത്തുനിന്ന് വിമാന-–-കപ്പൽ മാർഗം വരുന്ന കൊറിയറുകൾ എറണാകുളത്തെ ഫോറിൻ പോസ്റ്റ് ഓഫീസിലാണ് എത്തുന്നത്. ഇവിടെ സൂക്ഷ്മപരിശോധന നടത്തിയാണ് മേൽവിലാസക്കാർക്ക് കൈമാറുക. സംശയം തോന്നിയാൽ കസ്റ്റംസ് ഉദ്യോഗസ്ഥരെ അറിയിക്കുകയാണ് പതിവ്.
