ദുബായ്> യുഎഇയും ന്യൂസിലൻഡും സമഗ്ര സാമ്പത്തിക പങ്കാളിത്ത കരാറുമായി ബന്ധപ്പെട്ട് പ്രാഥമിക ചർച്ചകൾ ആരംഭിച്ചു.
യു എ ഇ വിദേശ വ്യാപാര സഹമന്ത്രി ഡോ. താനി ബിൻ അഹമ്മദ് അൽ സെയൂദി, ന്യൂസിലൻഡിന്റെ വ്യാപാര, കയറ്റുമതി വളർച്ചാ മന്ത്രി ഡാമിയൻ ഒ കോണറുമായി ദുബായിൽ കൂടിക്കാഴ്ച നടത്തി.
ഇരു രാജ്യങ്ങൾ തമ്മിലുള്ള ശക്തമായ ബന്ധത്തെ അൽ സെയൂദി അഭിനന്ദിച്ചു. കാർഷികം പോലുള്ള പ്രധാന മേഖലകളിൽ സഹകരണം , പുനരുപയോഗ ഊർജം, ആരോഗ്യ സംരക്ഷണം എന്നിവ സംബന്ധിച്ചും ചർച്ചകൾ നടന്നു .
2024-ൽ അബുദാബിയിൽ നടക്കുന്ന ലോക വ്യാപാര സംഘടനയുടെ 13-ാമത് മന്ത്രിതല സമ്മേളനത്തിന്റെ തയ്യാറെടുപ്പുകളെക്കുറിച്ച് അൽ സെയൂദി ഡാമിയൻ ഒ കോണറുമായി സംസാരിച്ചു.
അറബ് ലോകത്തെ ന്യൂസിലൻഡിന്റെ മുൻനിര വ്യാപാര പങ്കാളിയാണ് യുഎഇ. 2022-ൽ എണ്ണ ഇതര വ്യാപാരം 805 മില്യൺ ഡോളറിലെത്തിയിട്ടുണ്ട്. 2021-നെ അപേക്ഷിച്ച് ഏഴ് ശതമാനം വളർച്ചയും 2020-നെ അപേക്ഷിച്ച് 23 ശതമാനവും കൂടുതലാണ്.ന്യൂസിലൻഡിന്റെ മൊത്തം വിദേശ വ്യാപാരത്തിന്റെ 2.5 ശതമാനം വരും.
