പുതുപ്പള്ളി
ഇടുക്കി പൈനാവ് എൻജിനിയറിങ് കോളേജിലെ എസ്എഫ്ഐ പ്രവർത്തകൻ ധീരജ് രാജേന്ദ്രനെ കുത്തിക്കൊന്ന കേസിലെ മുഖ്യപ്രതിയായ യൂത്ത് കോൺഗ്രസ് നേതാവ് നിഖിൽ പൈലി പുതുപ്പള്ളിയിൽ യുഡിഎഫ് പ്രചാരണം നയിക്കുന്നതിനെ ന്യായീകരിച്ച് സ്ഥാനാർഥി ചാണ്ടി ഉമ്മൻ. നിഖിൽ പൈലി വന്നതിൽ എന്താണ് തെറ്റെന്നും നിഖിൽ കുറ്റക്കാരനെന്ന് തെളിഞ്ഞിട്ടില്ലെന്നും ചാണ്ടി ഉമ്മൻ പറഞ്ഞു. കൊലക്കേസിൽ പ്രതിയായ ശേഷമാണ് യൂത്ത് കോൺഗ്രസ് ഔട്ട്റീച്ച് സെൽ വൈസ് ചെയർമാനായി നിഖിൽ പൈലിയെ നിയമിച്ചത്. ഔട്ട്റീച്ച് സെൽ ദേശീയ ചെയർമാൻ ചാണ്ടി ഉമ്മനാണ് ഭാരവാഹികളുടെ പട്ടിക പുറത്തിറക്കിയത്.
പുതുപ്പള്ളിയിൽ ചാണ്ടി ഉമ്മനും മറ്റ് യൂത്ത്–- കോൺഗ്രസ് നേതാക്കൾക്കുമൊപ്പമുള്ള നിഖിൽ പൈലിയുടെ ചിത്രം സമൂഹമാധ്യമങ്ങളിൽ പ്രചരിച്ചിരുന്നു. യൂത്ത് കോൺഗ്രസ് വാഴത്തോപ്പ് മണ്ഡലം പ്രസിഡന്റ് നിഖിൽ പൈലി, ഇടുക്കി മണ്ഡലം വൈസ് പ്രസിഡന്റ് ജെറിൻ ജോജോ, കെഎസ്യു ജില്ലാ സെക്രട്ടറി കട്ടപ്പന സ്വദേശി ജിതിൻ ഉപ്പുമാക്കൽ, ഇടുക്കി നിയോജക മണ്ഡലം പ്രസിഡന്റ് ചേലച്ചുവട് സ്വദേശി ടോണി തേക്കിലക്കാട്ട്, കെഎസ്യു ഇടുക്കി ജില്ലാ ജനറൽ സെക്രട്ടറി കമ്പിളികണ്ടം തെള്ളിത്തോട് നാണിക്കുന്നേൽ നിതിൻ ലൂക്കോസ് എന്നിങ്ങനെ നേതാക്കൾ നേരിട്ട് പങ്കെടുത്ത അപൂർവ കൊലപാതകമായിരുന്നു ധീരജിന്റേത്.
കൊല്ലണമെന്ന ഉദ്ദേശത്തോടെയാണ് കുത്തിയതെന്നും പ്രതികൾക്കെല്ലാം കുറ്റകൃത്യത്തിൽ ഒരേപോലെ പങ്കുണ്ടെന്നും റിമാൻഡ് റിപ്പോർട്ടിൽ വ്യക്തമാക്കുന്നു.
പ്രബുദ്ധരായ ജനം ഇത് തിരിച്ചറിയും: ജെയ്ക്
പുതുപ്പള്ളി ഉപതെരഞ്ഞെടുപ്പിൽ കൊലയാളിസംഘത്തെ ഉപയോഗിച്ചാണ് യുഡിഎഫ് പ്രചാരണം നടത്തുന്നതെന്ന് എൽഡിഎഫ് സ്ഥാനാർഥി ജെയ്ക് സി തോമസ്. കൊലക്കേസ് പ്രതി നിഖിൽ പൈലി യുഡിഎഫ് പ്രചാരണത്തിനെത്തിയ സംഭവത്തിൽ പ്രതികരിക്കുകയായിരുന്നു ജെയ്ക്.
‘‘കൊലപാതക സംഘത്തെ ഉപയോഗിച്ചാണ് യുഡിഎഫ് വോട്ടുപിടിക്കുന്നത്. കൊലപാതകികളെ സ്വീകരിക്കുന്ന നിലപാടാണോ യുഡിഎഫിനെന്ന് നേതാക്കൾ വ്യക്തമാക്കണം. പുതുപ്പള്ളിയിലെ പ്രബുദ്ധരായ ജനം ഇതു തിരിച്ചറിയും’’ ജെയ്ക് പറഞ്ഞു. നിഖിൽ പൈലി പ്രചാരണത്തിന് വന്നതിൽ എന്താണ് തെറ്റെന്നും നിഖിൽ കുറ്റക്കാരനെന്ന് തെളിഞ്ഞിട്ടില്ലെന്നുമായിരുന്നു യുഡിഎഫ് സ്ഥാനാർഥി ചാണ്ടി ഉമ്മന്റെ ന്യായീകരണം.
