മലപ്പുറം> ഒരു പവന്റെ സ്വർണമാല ഉടമസ്ഥനെ തിരിച്ചേൽപ്പിച്ച് വിദ്യാർത്ഥികൾ മാതൃകയായി. ഫുട്ബോൾ കളിക്കുന്നതിനിടെ കണ്ടുകിട്ടിയ മാലയാണ് വിദ്യാർത്ഥികളായ സിനോയ് ബാബുവും ഷാമിലും ഉടമസ്ഥനെ തേടിപിടിച്ച് നൽകിയത്.
മലപ്പുറം പള്ളിക്കൽ പഞ്ചായത്തിലെ ഇരുപത്തൊന്നാം വാർഡിലെ കുറുന്തലയിൽ സജീഷിന്റെ മകളുടെ മാലയാണ് കഴിഞ്ഞ ദിവസം നഷ്ടപ്പെട്ടത്. സജീഷിന്റെ കുടുംബവും പരിസരവാസികളും തിരിച്ചിൽ നടത്തിയെങ്കിലും മാല കണ്ടെത്താൻ കഴിഞ്ഞിരുന്നില്ല. മാല ലഭിച്ച സന്തോഷത്തിൽ രണ്ട് വിദ്യാർത്ഥികൾക്കും സജീഷും കുടുംബവും ബൂട്ട് വാങ്ങി നൽകി.
ഫുട്ബോൾ ടീമിന് ജേഴ്സിന് വാങ്ങാൻ പണം കണ്ടെത്തുന്നതിനായി ഏകദിന ടൂർണമെന്റെ സംഘടിപ്പിക്കുന്നതിനിടെയാണ് വിദ്യാർത്ഥികൾക്ക് മാല വീണുകിട്ടയത്. സത്യസന്ധത പുലർത്തി നാടിന് മാതൃകകാട്ടിയ സിനോയ് ബാബുവിനെയും ഷാമിലിനെയും നാട്ടുകാർ വാർഡ് മെമ്പറുടെ ആഭിമുഖ്യത്തിൽ ആദരിച്ചു.
