തിരുവനന്തപുരം
‘അറിവിനോട് കേരളം നോ പറയില്ല; കേരളം പറയുന്നു യെസ് ’–- ഏഷ്യയിലെ ഏറ്റവും വലിയ പെൺപള്ളിക്കൂടത്തിൽ തിങ്ങിനിറഞ്ഞ സദസ്സിനെ സാക്ഷിനിർത്തി മുഖ്യമന്ത്രി പിണറായി വിജയൻ അധിക പാഠപുസ്തകങ്ങൾ പ്രകാശിപ്പിച്ചപ്പോൾ സദസ്സ് കരഘോഷം മുഴക്കി. പാഠപുസ്തകങ്ങളിൽനിന്ന് എൻസിഇആർടി ഒഴിവാക്കിയ ഗാന്ധിവധവും ജനാധിപത്യവും മതനിരപേക്ഷതയും ഉൾക്കൊള്ളിച്ച് പ്ലസ് വൺ, പ്ലസ് ടു ക്ലാസുകളിലേക്ക് കേരളം തയ്യാറാക്കിയ അധിക പാഠപുസ്തകങ്ങൾ കോട്ടൺഹിൽ സ്കൂളിൽ മുഖ്യമന്ത്രി പിണറായി വിജയൻ പ്രകാശിപ്പിച്ചു. പൊതുവിദ്യാഭ്യാസ മന്ത്രി വി ശിവൻകുട്ടി അധ്യക്ഷനായി. വിദ്യാർഥികളായ ശിവാനി പ്രിയ, ദേവിക, ബാലകൃഷ്ണ, അൻസിൽ അഹമ്മദ് എന്നിവർ പുസ്തകങ്ങൾഏറ്റുവാങ്ങി.
ഹിസ്റ്ററി, പൊളിറ്റിക്കൽ സയൻസ്, ഇക്കണോമിക്സ്, സോഷ്യോളജി പുസ്തകങ്ങളിലാണ് വെട്ടിമാറ്റലുകൾ നടന്നത്. ഇവ ഉൾക്കൊള്ളിച്ച് നാലു വിഷയത്തിൽ ആറ് അധിക പാഠപുസ്തകമാണ് പുറത്തിറക്കിയത്. ചരിത്രത്തിൽ മുഗൾ ചരിത്രം, വ്യാവസായിക വിപ്ലവം, ഇന്ത്യാവിഭജന ചരിത്രം തുടങ്ങിയവയും പൊളിറ്റിക്കൽ സയൻസിൽ ഗാന്ധിജിയുടെ രക്തസാക്ഷിത്വം, പഞ്ചവത്സര പദ്ധതികൾ, അടിയന്തരാവസ്ഥ, ഇന്ത്യയിലെ ജനകീയ സമരങ്ങൾ തുടങ്ങിയവയുമാണ് ഉൾപ്പെടുത്തിയത്.
പൊതുവിദ്യാഭ്യാസ പ്രിൻസിപ്പൽ സെക്രട്ടറി റാണി ജോർജ്, ഡയറക്ടർ എസ് ഷാനവാസ്, എസ്സിഇആർടി ഡയറക്ടർ ആർ കെ ജയപ്രകാശ്, സാക്ഷരതാമിഷൻ ഡയറക്ടർ എ ജി ഒലീന, കൗൺസിലർ രാഖി രവികുമാർ, എസ്എസ്കെ ഡയറക്ടർ എ ആർ സുപ്രിയ, കൈറ്റ് സിഇഒ കെ അൻവർ സാദത്ത്, എസ്ഐഇടി ഡയറക്ടർ ബി അബുരാജ്, സീമാറ്റ് ഡയറക്ടർ വി ടി സുനിൽ, വി ഗ്രീഷ്മ, രാജേഷ് ബാബു, ജി ഗീത, റഷീദ് ആനപ്പുറം എന്നിവർ സംസാരിച്ചു.
ശാസ്ത്രാവബോധവും മാനവികതയും
ഉയർത്തിപ്പിടിക്കുന്നതാകണം വിദ്യാഭ്യാസം: മുഖ്യമന്ത്രി
വസ്തുനിഷ്ഠവും ശാസ്ത്രീയവുമായ വിദ്യാഭ്യാസമാണ് വിദ്യാർഥികൾക്ക് നൽകേണ്ടതെന്നും ഇത് മാനവികത ഉയർത്തിപ്പിടിക്കുന്നതാകണമെന്നും മുഖ്യമന്ത്രി പിണറായി വിജയൻ പറഞ്ഞു. എൻസിഇആർടി ഒഴിവാക്കിയ പാഠഭാഗങ്ങൾ ഉൾപ്പെടുത്തിയ ഹയർ സെക്കൻഡറി അഡീഷണൽ പാഠപുസ്തകങ്ങൾ പ്രകാശിപ്പിക്കുകയായിരുന്നു മുഖ്യമന്ത്രി.
സ്മാർട്ട് ക്ലാസ് റൂമുകളും ലൈബ്രറികളും ലാബുകളുമുള്ള കേരളത്തിലെ സ്കൂളുകൾ രാജ്യത്തിന് മാതൃകയാണ്. 2023– 24 അധ്യയന വർഷത്തിൽ എൻസിഇആർടി ചില പാഠപുസ്തകങ്ങളിലെ പാഠഭാഗങ്ങൾ നീക്കം ചെയ്യുന്ന സാഹചര്യമുണ്ടായി. സംസ്ഥാന സർക്കാരിന്റെ നിർദേശപ്രകാരം എസ്സിഇആർടി വിദഗ്ധ സമിതി ഇത് പരിശോധിച്ച് തുടർ നടപടിയെടുത്തു.
ഇതിന്റെ അടിസ്ഥാനത്തിൽ ഹയർ സെക്കൻഡറി പ്ലസ് വൺ ക്ലാസിനുള്ള ഹിസ്റ്ററി, പൊളിറ്റിക്സ്, ഇക്കണോമിക്സ്, സോഷ്യോളജി വിഷയങ്ങളിൽ ഒഴിവാക്കിയ പാഠഭാഗങ്ങൾ ഉൾപ്പെടുത്തി പാഠപുസ്തകങ്ങൾ അച്ചടിച്ചു. ഗാന്ധിവധം, മുഗൾ ചരിത്രം, പഞ്ചവത്സര പദ്ധതികൾ എന്നിവ ഇതിലുൾപ്പെടുന്നു. സങ്കുചിത മതരാഷ്ട്രബോധത്തിനപ്പുറം മതനിരപേക്ഷമായി ചിന്തിക്കാൻ കഴിയുന്ന സമൂഹമാണ് രൂപപ്പെടേണ്ടത്. വിദ്യാലയങ്ങളെ സാമൂഹിക പുരോഗതിക്കായി ഉപയോഗിക്കണമെങ്കിൽ ചരിത്രത്തെയും സമൂഹത്തെയും ശാസ്ത്രത്തെയും വ്യക്തമായി മനസ്സിലാക്കാൻ കഴിയണമെന്നും മുഖ്യമന്ത്രി പറഞ്ഞു.
