കുവൈത്ത് സിറ്റി > കുവൈത്തിൽ നഴ്സിംഗ് ജീവനക്കാരുടെ നിയമനവുമായി ബന്ധപ്പെട്ട് 2018 മുതൽ ഇടനില കമ്പനികളുമായി ഇടപാടുകൾ നടത്തുന്നില്ലെന്ന് ആരോഗ്യ മന്ത്രാലയം വ്യക്തമാക്കി. സോഷ്യൽ മീഡിയകളിൽ പ്രചരിക്കുന്ന പരസ്യങ്ങളുമായി മന്ത്രാലയത്തിന് യാതൊരു ബന്ധവുമില്ലെന്നും അധികൃതർ അറിയിച്ചു.
നഴ്സിംഗ് ജോലികൾക്കായുള്ള ഒഴിവുകൾക്കുള്ള എല്ലാ അപേക്ഷകളും ആരോഗ്യ മന്ത്രാലയം നേരിട്ട് ബന്ധപ്പെട്ട രാജ്യങ്ങളിലെ സർക്കാർ ഏജൻസികളുമായി ധാരണാപത്രങ്ങൾ വഴിയാണ് കൈകാര്യം ചെയ്യുന്നത്.വിദേശത്ത് നിന്നുള്ള നഴ്സിംഗ് റിക്രൂട്ട്മെന്റിന് പിന്തുടരുന്ന പ്രക്രിയ ആ രാജ്യങ്ങളിലെ പ്രസക്തമായ സർക്കാർ സ്ഥാപനങ്ങൾ വഴിയാണ് നടക്കുന്നത്. തുടർന്ന് വ്യക്തിഗത അഭിമുഖങ്ങളും പരീക്ഷയും നടത്തും.
പാകിസ്ഥാൻ, ജോർദാൻ തുടങ്ങിയ ചില രാജ്യങ്ങളിലൊഴികെ വിദേശത്ത് നിന്ന് നഴ്സിംഗ് റിക്രൂട്ട്മെന്റുകളൊന്നും അടുത്ത കാലത്തായി നടക്കുന്നില്ല. ഇന്തോനേഷ്യ, ശ്രീലങ്ക, ടുണീഷ്യ എന്നിവിടങ്ങളിൽ ഈ രാജ്യങ്ങളിലെ ബന്ധപ്പെട്ട സർക്കാർ സ്ഥാപനം വഴി പുതിയ റിക്രൂട്ട്മെന്റ് പ്രഖ്യാപിച്ചിട്ടുണ്ട്. ഇത്തരം പരസ്യങ്ങളുടെ കൃത്യതയും വിശ്വാസ്യതയും പരിശോധിക്കാൻ മന്ത്രാലയം എല്ലാവരോടും അഭ്യർത്ഥിച്ചു.
