ന്യൂഡൽഹി
കോൺഗ്രസ് നേതാവും മുൻ പ്രധാനമന്ത്രിയുമായ രാജീവ് ഗാന്ധി ആർഎസ്എസ് നേതൃത്വവുമായി പലവട്ടം കൂടിക്കാഴ്ച നടത്തിയെന്ന് വെളിപ്പെടുത്തൽ. മുതിര്ന്ന പത്രപ്രവർത്തക നീരജ ചൗധുരിയുടെ ഉടൻ പുറത്തിറങ്ങുന്ന ‘ഹൗ പ്രൈംമിനിസ്റ്റേഴ്സ് ഡിസൈഡ്’ എന്ന പുസ്തകത്തിലാണ് കോൺഗ്രസ് നേതൃത്വവും ആർഎസ്എസ് നേതൃത്വവും എൺപതുകളിൽ പലവട്ടം കൂടിയാലോചന നടത്തിയതിന്റെ വിശദമാശം പുറത്തുവിടുന്നത്.
അടിയന്തരാവസ്ഥാഘട്ടത്തിൽ ആർഎസ്എസ് നേതൃത്വം പ്രധാനമന്ത്രിഇന്ദിരാ ഗാന്ധിയുമായി ആശയവിനിമയം നടത്തിയിരുന്നു. എന്നാൽ, ആർഎസ്എസ് നേതാക്കളുമായി കൂടിക്കാഴ്ചയ്ക്ക് ഇന്ദിര തയ്യാറായില്ല. അടിയന്തരാവസ്ഥയ്ക്കുശേഷം അധികാരത്തിൽനിന്ന് പുറത്തുപോയ ഇന്ദിര 1980ൽ വീണ്ടും പ്രധാനമന്ത്രിയായി. 1982ൽ അന്നത്തെ ആർഎസ്എസ് തലവൻ ബാലാസാഹെബ് ദേവ്റസിന്റെ സഹോദരൻ ഭാവുറാവു ദേവ്റസുമായി കൂടിക്കാഴ്ച നടത്താൻ ഇന്ദിര മകൻ രാജീവിനോട് നിര്ദേശിച്ചു. ആർഎസ്എസിന്റെ രാഷ്ട്രീയകാര്യങ്ങളുടെ ചുമതല അക്കാലത്ത് ഭാവുറാവുവിനായിരുന്നു. ഇന്ദിരയുടെ വിശ്വസ്തനായ കപിൽ മോഹൻ എന്ന ബിസിനസുകാരന് കോൺഗ്രസ്–- ആർഎസ്എസ് ചർച്ചകൾക്ക് ഇടനിലക്കാരനായി.
1982–-84 കാലയളവിൽ മൂന്നുവട്ടം രാജീവ് ആർഎസ്എസ് നേതൃത്വവുമായി കൂടിക്കാഴ്ച നടത്തി. അടച്ചിട്ടിരിക്കയായിരുന്ന ബാബറി മസ്ജിദ് 1986ലാണ് പൂജകൾക്കായി രാജീവ് ഗാന്ധി തുറന്നുകൊടുക്കുന്നത്. ആർഎസ്എസ് താൽപ്പര്യപ്രകാരമായിരുന്നു നീക്കം. ഇതോടെയാണ് അയോധ്യാപ്രസ്ഥാനം ശക്തിപ്രാപിക്കുന്നതും സംഘപരിവാർ ഇന്ത്യയിൽ രാഷ്ട്രീയശക്തിയായി വളർന്നതും.
കപിൽ മോഹന്റെ ഡൽഹി പുസാ റോഡിലെ 46–-ാം നമ്പർ വസതിയിൽ 1982 സെപ്തംബറിലാണ് രാജീവ് ഗാന്ധിയും ഭാവുറാവു ദേവ്റസും ആദ്യം കൂടിക്കാഴ്ച നടത്തിയത്. രണ്ടാമത്തെ കൂടിക്കാഴ്ചയും പുസാ റോഡ് വസതിയിലായിരുന്നു. പിന്നീട് ഡൽഹി ഫ്രണ്ട്സ് കോളനിയിൽ കപിൽ മോഹന്റെ അനന്തരവൻ അനിൽ ബാലിയുടെ വസതിയിലും രാജീവും ദേവ്റസും കൂടിക്കാഴ്ച നടത്തി. 1991 ലെ ലോക്സഭാ തെരഞ്ഞെടുപ്പിനുമുമ്പായും ചർച്ച നടത്തി. പത്ത് ജൻപഥിലായിരുന്നു കൂടിക്കാഴ്ച.
രാജീവ് ഗാന്ധിയും ദേവ്റസുമായുള്ള ആദ്യ കൂടിക്കാഴ്ചകൾക്ക് വഴിയൊരുക്കിയത് ഇന്ദിരയുടെ പൊളിറ്റിക്കൽ സെക്രട്ടറിയായിരുന്ന എം എൽ ഫൊത്തേദാറാണെന്നും പുസ്തകത്തിൽ പറയുന്നു. രാജീവ് ഗാന്ധിയിൽ ഹൈന്ദവാശയങ്ങളുടെ സ്വാധീനമുണ്ടായത് ഫൊത്തേദാറിലൂടെയാണെന്നും പുസ്തകം വിവരിക്കുന്നു.
