സ്വപ്ന സാക്ഷാത്കാരത്തിലേക്കുള്ള അടങ്ങാത്ത ആഗ്രഹവും ആകാംഷയും പങ്കുവച്ച് ‘യാത്ര’ ഷോർട് ഫിലിം പുറത്തിറങ്ങി. ഫ്ലാഷ് ബാക്ക് കഥ പറച്ചിലിന് ഒപ്പം വൈകാരികതയും ചേർത്ത് മനു വിശ്വംഭരൻ കഥ, തിരക്കഥ, സംവിധാനം നിർവഹിച്ച ഹ്രസ്വചിത്രം ‘യാത്ര’ ആസ്വാദക പ്രശംസ നേടുന്നു. ഇതിനോടകം നിരവധി അവാർഡുകൾ കരസ്ഥമാക്കിയ ചിത്രം തിങ്കളാഴ്ച ഗാറ്റ് സ്റ്റുഡിയോസ് യൂട്യൂബ് ചാനലിലൂടെ റിലീസ് ചെയ്തു.
സിനിമയെന്ന സ്വപ്നം പേറി നടക്കുന്ന ഒരുപാട് പേരുടെ ജീവിതങ്ങളാണ് ഒമ്പതര മിനിട്ട് ദൈർഘ്യമുള്ള ‘യാത്ര’യിലൂടെ സംവിധായകൻ അവതരിപ്പിക്കുന്നത്.
ബോബി നായർ, എം എസ് ശ്രീനിവാസൻ, പി സീതാലക്ഷ്മി എന്നിവർ പ്രധാന കഥാപാത്രങ്ങളാകുന്നു. ബിയോണ്ട് തോട്സ് പ്രൊഡക്ഷൻസിന്റെ ബാനറിൽ ശീതൾ ദിലീപ് നിർമിച്ച ചിത്രത്തിന്റെ കാമറ ഗോഡ്വിൻ ആന്റണി ടൈറ്റസാണ്. എഡിറ്റർ: അതുൽ രാജൻ. സംഗീതം: ഇ എം ആരോമൽ. അഖിൽ അനിൽ, ജെഫിൻ ജോസ് എന്നിവരാണ് സംവിധാന സഹായികൾ.
വൈലോപ്പിള്ളി സംസ്കൃതിഭവൻ സംഘടിപ്പിച്ച എഎസ്എംഎംഎ ഷോർട്ട്ഫിലിം മത്സരത്തിൽ മികച്ച ഫിലിം, സംവിധായകൻ, കഥ, തിരക്കഥ, മലയാള ചിത്രം, എഡിറ്റർ, കാമറാമാൻ തുടങ്ങി നിരവധി പുരസ്കാരങ്ങൾ യാത്രയ്ക്ക് ലഭിച്ചിട്ടുണ്ട്.
