നോട്ടിങ്ഹാം
വനിതാ ആഷസ് ഓസ്ട്രേലിയക്ക്. ഏക ക്രിക്കറ്റ് ടെസ്റ്റിൽ 89 റണ്ണിനായിരുന്നു ഓസീസ് ഇംഗ്ലണ്ടിനെ തോൽപ്പിച്ചത്. 268 റൺ ലക്ഷ്യവുമായി ഇറങ്ങിയ ഇംഗ്ലണ്ട് അഞ്ചാംദിനം 178ന് പുറത്തായി. രണ്ട് ഇന്നിങ്സുകളിലായി 12 വിക്കറ്റെടുത്ത ഓസീസ് ഓൾ റൗണ്ടർ ആഷ്ലി ഗാർഡ്നെറാണ് തിളങ്ങിയത്.
സ്കോർ: ഓസീസ് 473, 257; ഇംഗ്ലണ്ട് 463, 178
ഗാർഡ്നെറായിരുന്നു ഓസീസിന്റെ കരുത്ത്. രണ്ടാം ഇന്നിങ്സിൽ എട്ട് വിക്കറ്റാണ് നേടിയത്. ഒന്നാം ഇന്നിങ്സിൽ നാല് വിക്കറ്റ് നേടി. 40 റണ്ണും സ്വന്തമാക്കി.
നാലാംദിനം അവസാനഘട്ടത്തിൽത്തന്നെ ഇംഗ്ലണ്ട് തകർച്ച നേരിട്ടിരുന്നു. നാല് വിക്കറ്റ് നഷ്ടത്തിൽ 18 റണ്ണെന്ന നിലയിലായിരുന്നു അവർ. അഞ്ചാംദിനം 54 റണ്ണെടുത്ത ഡാനി വ്യാത്ത് ഇംഗ്ലണ്ടിനായി പൊരുതി. പക്ഷേ, പിന്തുണ കിട്ടിയില്ല. 20 ഓവറിൽ ഒരു മെയ്ഡൻ ഉൾപ്പെടെ 66 റൺ വഴങ്ങിയാണ് ഗാർഡ്നെർ എട്ട് വിക്കറ്റെടുത്തത്. വനിതാ ടെസ്റ്റ് ക്രിക്കറ്റിലെ ഏറ്റവും മികച്ച രണ്ടാമത്തെ പ്രകടനമാണിത്.2015ലെ പരമ്പരയ്ക്കുശേഷമുള്ള ആദ്യ ജയമാണ് ഓസീസിന്.
