കൊച്ചി> കെപിസിസി പ്രസിഡന്റ് കെ സുധാകരൻ, മോൻസണിന്റെ വീട്ടിൽ വന്നപ്പോൾ ചായ നൽകിയത് പോക്സോ കേസിൽ ഇരയായ പെൺകുട്ടിയെന്ന് മോൻസണിന്റെ മുൻഡ്രൈവർ അജിത്തിന്റെ വെളിപ്പെടുത്തൽ. സുധാകരന് അതിജീവിത ചായ നൽകിയത് നേരിട്ട് കണ്ടതായി കലൂർ സ്വദേശിയായ അജിത്ത് പറഞ്ഞു.
എംപി അല്ലാതിരുന്ന സമയത്ത് 2018ലാണ് സുധാകരൻ 10 ദിവസം മോൻസണൊപ്പം താമസിച്ചത്. എംപിയായശേഷം 2019ൽ വീണ്ടും മോൻസണിന്റെ വീട്ടിൽ എത്തി. അപ്പോഴും സുധാകരന് പെൺകുട്ടി ചായ നൽകുന്നത് കണ്ടെന്ന് അജിത് പറയുന്നു.
വീട്ടുജോലിക്കാരിയുടെ പതിനേഴുകാരിയായ മകളെ 2019 ജൂലൈയിൽ മോൻസൺ പീഡിപ്പിച്ചെന്നാണ് പോക്സോ കേസ്. ഗർഭിണിയാക്കിയശേഷം ഗർഭഛിദ്രം നടത്തിച്ചു. കലൂർ വൈലോപ്പിള്ളി ലെയ്നിലെ മോൻസണിന്റെ വീട്ടിലും മ്യൂസിയമാക്കിയിരുന്ന വസതിയിലുമായിരുന്നു പീഡനം. പുരാവസ്തു തട്ടിപ്പുകേസിൽ 2021 സെപ്തംബർ ഇരുപത്താറിനാണ് മോൻസൺ അറസ്റ്റിലായത്. ഇതിന് രണ്ടുദിവസംമുമ്പുവരെ പീഡിപ്പിച്ചതായാണ് കേസ്.
