തൃപ്പൂണിത്തുറ
ഉദയംപേരൂരിൽ വിവാഹത്തോടനുബന്ധിച്ച് നടത്തിയ സൽക്കാരത്തിൽ പങ്കെടുത്ത് ഭക്ഷ്യവിഷബാധയേറ്റ് ആശുപത്രിയിൽ ചികിത്സ തേടിയവർ 72 ആയി. ചികിത്സ തേടിയ ആർക്കും കാര്യമായ ആരോഗ്യപ്രശ്നങ്ങളില്ല. വയറിളക്കം, ഛർദി, പനി തുടങ്ങിയവയാണ് ലക്ഷണങ്ങൾ കണ്ടത്. കൂടുതൽപേരും പ്രാഥമികചികിത്സ തേടി മടങ്ങി. നാലുപേരാണ് കിടത്തി ചികിത്സയിലുള്ളത്.
ഉദയംപേരൂർ മാളേകാട്ട് വിവാഹത്തോടനുബന്ധിച്ച് വരന്റെ വീട്ടിൽ ശനി രാത്രി നടന്ന സൽക്കാരങ്ങളിൽ പങ്കെടുത്തവർക്കാണ് ഭക്ഷ്യവിഷബാധയേറ്റത്. ഞായർ രാവിലെമുതൽ വയറുവേദനയുമായി ആളുകൾ എത്തിയിരുന്നു. വൈകിട്ടോടെ ചികിത്സതേടിയവരുടെ എണ്ണം വർധിക്കുകയായിരുന്നു. സദ്യ നടന്ന വീട്ടിൽ മീൻകറിയിൽനിന്നാണ് ഭക്ഷ്യവിഷബാധയെന്ന് കരുതുന്നു. ആരോഗ്യവകുപ്പ് ഉദ്യോഗസ്ഥർ സംഭവം നടന്ന വീട്ടിലെത്തി പരിശോധന നടത്തി.
