തൃശൂർ> പതിമൂന്നുകാരനെ പീഡിപ്പിച്ച കോൺഗ്രസ് പ്രാദേശിക നേതാവ് പോക്സോ കേസിൽ അറസ്റ്റിൽ. കോലഴി പഞ്ചായത്ത് മുൻ പ്രസിഡന്റ് കുറ്റൂർ പുതുക്കുളങ്ങര വീട്ടിൽ പി ജി ഉണ്ണികൃഷ്ണനെയാണ് (56) വിയ്യൂർ പൊലീസ് അറസ്റ്റ് ചെയ്തത്. കഴിഞ്ഞ മാസമായിരുന്നു സംഭവം. കുറ്റൂർ പാടത്ത് മീൻ പിടിക്കാനെത്തിയ കുട്ടിയെ പീഡിപ്പിച്ചുവെന്നാണ് കേസ്. കഴിഞ്ഞ ദിവസം സ്കൂൾ കൗൺസിലർ വിദ്യാർഥികൾക്കായി ക്ലാസെടുത്തിരുന്നു. ഇതേത്തുടർന്ന് അധ്യാപികയോട് കുട്ടി ഇക്കാര്യം വെളിപ്പെടുത്തി. വിവരം പ്രധാന അധ്യാപികയെ അറിയിച്ചതിനെത്തുടർന്ന് രക്ഷിതാക്കളെ സ്കൂളിലേക്ക് വരുത്തി സംഭവം ശ്രദ്ധയിൽപ്പെടുത്തി.
രക്ഷിതാക്കളോടൊപ്പം പോകുന്നതിനിടെ പ്രതിയെ വഴിയിൽ കണ്ടു. രക്ഷിതാക്കളോട് പറയുകയും ചെയ്തു. തുടർന്ന് പ്രതിയുമായി രക്ഷിതാക്കൾ വാക്കുതർക്കമുണ്ടായി. വീട്ടുകാർ പൊലീസ് സ്റ്റേഷനിൽ പരാതി നൽകി. കൂടുതൽ വിവരങ്ങൾ സ്കൂളിൽനിന്ന് സമാഹരിച്ച ശേഷമാണ് പ്രതിയെ വിയ്യൂർ എസ്ഐ കെ സി ബൈജു അറസ്റ്റ് ചെയ്തത്. പ്രതിയെ കോടതി റിമാൻഡ് ചെയ്തു. കഴിഞ്ഞ പഞ്ചായത്ത് ഭരണസമിതിയിൽ ആദ്യ രണ്ടര വർഷം പി ജി ഉണ്ണികൃഷ്ണൻ പ്രസിഡന്റായിരുന്നു. ദീർഘകാലമായി കോൺഗ്രസ് പ്രവർത്തനങ്ങളിൽ സജീവമാണ്. കുട്ടി പഠിക്കുന്ന സ്കൂളിലെ പിടിഎ മുൻ പ്രസിഡന്റുമായിരുന്നു.
