തിരുവനന്തപുരം
ഓട്ടോ തൊഴിലാളികൾക്കായി സഹകരണ വകുപ്പിന്റെ പ്രത്യേക വായ്പാ പദ്ധതി. പുതിയ ഓട്ടോറിക്ഷ വാങ്ങുന്നതിനും നിലവിലുള്ളവയുടെ അറ്റകുറ്റപ്പണികൾക്കുമായി ‘സഹായഹസ്തം’ വായ്പാ പദ്ധതി തുടങ്ങും. സംസ്ഥാന സർക്കാരിന്റെ നൂറുദിന പരിപാടിയുടെ ഭാഗമായി പ്രാഥമിക സഹകരണ സംഘങ്ങൾ വഴിയാകും പദ്ധതി നടപ്പാക്കുകയെന്ന് സഹകരണ മന്ത്രി വി എൻ വാസവൻ പറഞ്ഞു. 20,000 രൂപവരെ സ്വന്തം ജാമ്യത്തിൽ വായ്പ അനുവദിക്കും. 10 ശതമാനമാണ് പലിശ. ആഴ്ചതവണ വ്യവസ്ഥയിൽ രണ്ടുവർഷത്തിനകം തിരിച്ചടച്ചാൽ മതി.
വഴിയോര കച്ചവടത്തിനും സഹായം
വഴിയോര കച്ചവടക്കാർക്കും ചെറുസംരംഭകർക്കും സഹകരണ സഹായഹസ്തം വായ്പാ പദ്ധതി നടപ്പാക്കും. 20,000 രൂപ അനുവദിക്കും. 10,000 രൂപവരെ മൂലധന ചെലവായും, ബാക്കിതുക പ്രവർത്തന മൂലധനവുമായി ഉപയോഗിക്കാം. പത്തു ശതമാനം പലിശയിൽ ലഭിക്കുന്ന വായ്പ രണ്ടുവർഷത്തിനകം തിരിച്ചടച്ചാൽ മതി. ആഴ്ചത്തവണ സൗകര്യവുമുണ്ടാകും.
