കോഴിക്കോട് > നഴ്സിങ് വിദ്യാർഥിയെ മദ്യം നൽകി ബോധരഹിതയാക്കിയശേഷം സുഹൃത്തുക്കൾ ചേർന്ന് പീഡിപ്പിച്ചതായി പരാതി. കോഴിക്കോട്ട് നഴ്സിങ്ങിന് പഠിക്കുന്ന ഇരുപതുകാരിയുടെ പരാതിയിൽ കസബ പൊലീസ് എറണാകുളം സ്വദേശിയായ രണ്ട് യുവാക്കൾക്കെതിരെ കേസെടുത്ത് അന്വേഷണം തുടങ്ങി.
എറണാകുളം സ്വദേശിയായ പെൺകുട്ടി കോഴിക്കോട്ട് അവസാന വർഷ ബിഎസ്സി നഴ്സിങ്ങിന് പഠിക്കുകയാണ്. സുഹൃത്തും മെഡിക്കൽ കോഴ്സ് വിദ്യാർഥിയുമായ യുവാവ് പെൺകുട്ടിയെ സൗഹൃദം നടിച്ച് 18ന് രാത്രി ഒമ്പതോടെ ഇയാൾതാമസിക്കുന്ന മിംസ് ആശുപത്രിക്ക് സമീപത്തെ വാടക വീട്ടിലെത്തിച്ചു. മദ്യംനൽകി ബോധരഹിതയാക്കിയശേഷം എറണാകുളം സ്വദേശിയായ സുഹൃത്തിനെ വിളിച്ചുവരുത്തി. പുലർച്ചെ ഇരുവരും ചേർന്ന് യുവതിയെ പീഡിപ്പിച്ചു.
ബോധം വീണ്ടെടുത്ത പെൺകുട്ടി പുലർച്ചെ രണ്ടരയോടെ പുറത്തിറങ്ങി സഹപാഠിയായ യുവാവിനെ വിളിച്ചുവരുത്തി ബൈക്കിൽ രക്ഷപ്പെടുകയായിരുന്നുവെന്നാണ് മൊഴി. പെൺകുട്ടിയുടെ രക്ഷിതാക്കൾ എത്തിയാണ് കസബ പൊലീസിൽപരാതിനൽകിയത്. പെൺകുട്ടിയെ വൈദ്യ പരിശോധനക്ക് ശേഷം ബന്ധുക്കൾക്കൊപ്പം വിട്ടയച്ചു. യുവാക്കൾരണ്ടുപേരും മുമ്പ് പെൺകുട്ടിക്കൊപ്പം പഠിച്ചവരാണ്. ഇവരെ ഉടൻപിടികൂടുമെന്ന് കസബ സിഐ എൻ പ്രജീഷ് പറഞ്ഞു.
