കോഴിക്കോട്
ഐ ലീഗ് ഫുട്ബോളിൽ ഗോകുലം കേരള എഫ്സിക്ക് തുടർച്ചയായ രണ്ടാംതോൽവി. കോർപറേഷൻ ഇ എം എസ് സ്റ്റേഡിയത്തിൽ നടന്ന നിർണായകമത്സരത്തിൽ കരുത്തരായ റൗണ്ട്ഗ്ലാസ് പഞ്ചാബ് ഒന്നിനെതിരെ രണ്ട് ഗോളിന് ജയിച്ചു. കിട്ടിയ അവസരങ്ങൾ പാഴാക്കിയതിന് ഗോകുലം വലിയവില കൊടുക്കേണ്ടിവന്നു. ഇടവേളയ്ക്ക് പിരിയുംമുമ്പ് പവൻകുമാറിന്റെ സെൽഫ് ഗോളിൽ ഗോകുലം പിറകിലായി.
രണ്ടാംപകുതിയിൽ ആക്രമണം ശക്തമാക്കിയെങ്കിലും ഗോൾ പിറന്നില്ല. ഇതിനിടെ 70–-ാംമിനിറ്റിൽ പഞ്ചാബ് ലീഡ് ഉയർത്തി. കെയ്മിങ് താൻ ഹുങ്ങ്ക്ഡിമിന്റെ ഹെഡർ ഗോളി തടുത്തെങ്കിലും ലൂക്കാ മെയ്സൻ ലക്ഷ്യംകണ്ടു. മൂന്നു പകരക്കാരെ ഇറക്കി മൂന്നു മിനിറ്റിനുള്ളിൽ ഗോകുലം ഗോൾ മടക്കി. സൗരവ് നൽകിയ ക്രോസ് ഫർഷാദ് നൂർ വലയിലാക്കി. സമനിലയ്ക്കായി കിണഞ്ഞുശ്രമിച്ചെങ്കിലും ഫലംകണ്ടില്ല. അവസാനനീക്കം പോസ്റ്റിൽ തട്ടിത്തെറിച്ചതോടെ പഞ്ചാബ് ജയമുറപ്പിച്ചു. ഗോകുലം 15 കളിയിൽ 24 പോയിന്റുമായി മൂന്നാമതാണ്. ഞായറാഴ്ച മുഹമ്മദൻസിനെ നേരിടും. 16 കളിയിൽ 34 പോയിന്റുള്ള ശ്രീനിധി ഡെക്കാണും പഞ്ചാബുമാണ് ആദ്യ രണ്ട് സ്ഥാനങ്ങളിൽ.
