കേപ്ടൗൺ
വനിതകളുടെ ട്വന്റി20 ക്രിക്കറ്റ് ലോകകപ്പ് ഇന്ന് തുടങ്ങും. ഉദ്ഘാടന മത്സരത്തിൽ രാത്രി 10.30ന് ആതിഥേയരായ ദക്ഷിണാഫ്രിക്ക ശ്രീലങ്കയെ നേരിടും. എട്ടാമത്തെ ലോകകപ്പിൽ 10 ടീമുകളാണ് പങ്കെടുക്കുന്നത്.
ഗ്രൂപ്പ് എയിൽ ഓസ്ട്രേലിയ, ബംഗ്ലാദേശ്, ന്യൂസിലൻഡ്, ദക്ഷിണാഫ്രിക്ക, ശ്രീലങ്ക ടീമുകളും ഗ്രൂപ്പ് ബിയിൽ ഇന്ത്യ, ഇംഗ്ലണ്ട്, അയർലൻഡ്, പാകിസ്ഥാൻ, വെസ്റ്റിൻഡീസ് ടീമുകളുമുണ്ട്. ആദ്യ രണ്ട് സ്ഥാനക്കാർ സെമിയിലെത്തും. 23നും 24നും സെമിയാണ്. ഫൈനൽ 26ന് നടക്കും.
ഹർമൻപ്രീത് കൗറാണ് ഇന്ത്യൻ ക്യാപ്റ്റൻ. സ്മൃതി മന്ദാന വൈസ് ക്യാപ്റ്റനാണ്. ഇന്ത്യയുടെ ആദ്യകളി ഞായർ വൈകിട്ട് 6.30ന് പാകിസ്ഥാനെതിരെയാണ്. ഇതുവരെ കപ്പ് നേടാത്ത ഇന്ത്യ കഴിഞ്ഞതവണ ഫൈനലിൽ ഓസ്ട്രേലിയയോട് തോറ്റു.
