സൗഹൃദച്ചില്ലയിലെ 
വിജയപ്പൂക്കൾ ; അക്ഷരശ്ലോകം ഒന്നാംസമ്മാനം പങ്കുവച്ചു

കൊച്ചി
സൗഹൃദത്തിന്റെ മധുരമുണ്ട് ജ്യോത്സനയുടെയും രോഹിണിയുടെയും വിജയത്തിന്. മത്സരവേദിയിലെ സ്ഥിരം എതിരാളികളെങ്കിലും ചങ്കാണിവർ. എംജി കലോത്സവത്തിൽ അക്ഷരശ്ലോകം ഒന്നാംസമ്മാനം ഇരുവരും പങ്കുവച്ചു.എറണാകുളം മഹാരാജാസ് കോളേജ് എംകോം രണ്ടാംവർഷ വിദ്യാർഥിനിയാണ് ജ്യോത്സന. കുറവിലങ്ങാട് ദേവമാതാ കോളേജിലാണ് രോഹിണി. അക്ഷരശ്ലോകവും കാവ്യകേളിയുമാണ് രണ്ടുപേരുടെയും മത്സര ഇനങ്ങൾ. കഴിഞ്ഞ മൂന്നുവർഷവും അക്ഷരശ്ലോകത്തിൽ രണ്ടാംസ്ഥാനമായിരുന്നു ജ്യോത്സനയ്ക്ക്. കാവ്യകേളിയിൽ രണ്ടുതവണ ഒന്നാമതും. തെക്കേ വാഴക്കുളം സ്വദേശിനിയാണ്. കഴിഞ്ഞവർഷം കലോത്സവത്തിൽ അക്ഷരശ്ലോകം, കാവ്യകേളി മത്സരങ്ങളിൽ എ ഗ്രേഡായിരുന്നു രോഹിണിക്ക്. പാലാ മുത്തോലി സ്വദേശിനിയാണ് ഈ രണ്ടാംവർഷ ബിരുദവിദ്യാർഥി.