തിരുവനന്തപുരം> മുന് മുഖ്യമന്ത്രി ഉമ്മന് ചാണ്ടിയുടെ ചികിത്സാ മേല്നോട്ടത്തിന് ആരോഗ്യ വകുപ്പ് മെഡിക്കല് ബോര്ഡ് രൂപീകരിച്ചു. വിവിധ ഡിപ്പാര്ട്ട്മെന്റുകളിലെ വിദഗ്ധരായ ഡോക്ടര്മാരെ ഉള്പ്പെടുത്തിയാണ് ആറംഗ മെഡിക്കല് ബോര്ഡ് രൂപീകരിച്ചിരിക്കുന്നത്. ഉമ്മന്ചാണ്ടിയുടെ ആരോഗ്യാവസ്ഥയും ചികിത്സയും മെഡിക്കല് ബോര്ഡ് അവലോകനം ചെയ്യും. മെഡിക്കല് ബോര്ഡ് അംഗങ്ങള് സ്വകാര്യ ആശുപത്രിയിലെ ഡോക്ടര്മാരുമായി ആശയവിനിമയം നടത്തും.
മുഖ്യമന്ത്രിയുടെ നിര്ദേശ പ്രകാരം ആരോഗ്യ മന്ത്രി വീണാ ജോര്ജ്, ഉമ്മന് ചാണ്ടി ചികിത്സയില് കഴിയുന്ന ആശുപത്രിയിലെത്തി ഡോക്ടറേയും ബന്ധുക്കളേയും കണ്ടിരുന്നു. സന്ദര്ശന ശേഷം ആരോഗ്യ മന്ത്രി മുഖ്യമന്ത്രിയെ കണ്ട് ചര്ച്ച നടത്തിയിരുന്നു.
നിലവിൽ പനിയും ശ്വാസതടസവും മൂലം നെയ്യാറ്റിന്കര നിംസ് ആശുപത്രിയില് ചികിത്സയിലാണ്. ജര്മനിയിലെ ലേസര് സര്ജറിക്കുശേഷം ബംഗളൂരുവില് ഡോ. വിശാല് റാവുവിന്റെ ചികിത്സയിലായിരുന്നു ഉമ്മന്ചാണ്ടി. തുടര്പരിശോധനയ്ക്ക് ബംഗളൂരുവിലേക്ക് പോകാനിരിക്കേയാണ് പനി ബാധിച്ചത്.
