ലണ്ടൻ
ഇംഗ്ലീഷ് എഫ്എ കപ്പ് ഫുട്ബോളിൽ മാഞ്ചസ്റ്റർ സിറ്റി–-അഴ്സണൽ പോരാട്ടം. അഴ്സണൽ മൂന്നാംറൗണ്ടിൽ ഒക്സ്ഫോർഡ് യുണൈറ്റഡിനെ തോൽപ്പിച്ചതോടെയാണ് സിറ്റിയുമായുള്ള പോരാട്ടത്തിന് അവസരമൊരുങ്ങിയത്. മൂന്ന് ഗോളിനായിരുന്നു അഴ്സണലിന്റെ ജയം. ചെൽസിയെ തോൽപ്പിച്ചാണ് സിറ്റി നാലാംറൗണ്ടിൽ കടന്നത്.
എഡ്ഡീ എൻകെട്ടിയയുടെ തകർപ്പൻ പ്രകടനമാണ് അഴ്സണലിന് മികച്ച ജയമൊരുക്കിയത്. രണ്ടാംപകുതിയിൽ ആറ് മിനിറ്റിനിടെ എൻകെട്ടിയ ഇരട്ടഗോളടിച്ചു. ആദ്യ ഗോൾ മൊഹ്മെദ് എൽനെനിയുടെ വകയായിരുന്നു.
പരിക്കേറ്റ ഗബ്രിയേൽ ജെസ്യൂസിന് പകരമെത്തിയ എൻകെട്ടിയ അവസാന ആറ് കളിയിൽ അഞ്ച് ഗോളാണ് നേടിയത്.
ഇംഗ്ലീഷ് പ്രീമിയർ ലീഗ് പോയിന്റ് പട്ടികയിൽ ഒന്നാംസ്ഥാനത്താണ് മൈക്കേൽ അർടേറ്റയുടെ സംഘം. സിറ്റി രണ്ടാമതും. സിറ്റിയിൽ പെപ് ഗ്വാർഡിയോളയുടെ പരിശീലകസംഘത്തിലായിരുന്നു അർടേറ്റ.
