അരൂർ> ബൈക്കുകൾ കൂട്ടിയിടിച്ചുണ്ടായ അപകടത്തിൽ പിതാവ് മരിച്ചു. മകന് ഗുരുതര പരിക്ക്. അരൂർ തൈക്കടവിൽ അശോകൻ (58) ആണ് മരിച്ചത്. പരിക്കേറ്റ മകൻ അനന്തു (20)വിനെയും മറ്റൊരു ബൈക്ക് യാത്രികൻ തൃശ്ശൂർ ഇലഞ്ഞി പറമ്പിൽ സ്വദേശി നിർമ്മൽവർഗീസിനെയും ലേക് ഷോർ ആശുപത്രിയിൽ പ്രവേശിപ്പിച്ചു. പിതാവും മകനും ചന്തിരൂരിൽ ബന്ധുവിന്റെ മരണ വീട്ടിൽ പോയിമടങ്ങുമ്പോഴായിരുന്നു അപകടം.
ബൈക്കുകൾ കൂട്ടി ഇടിച്ചു മറിഞ്ഞപ്പോൾ റോഡിലേക്ക് തെറിച്ചു വീണ അശോകന്റെ ദേഹത്ത് മിനിലോറി കയറി ഇറങ്ങിയതിനെ തുടർന്നാണ് മരണം സംഭവിച്ചത്.ലോറി ഡ്രൈവർ കോട്ടയം സ്വദേശി ഷൈജുവിനെ അരൂർപോലീസ് കസ്റ്റഡിയിലെടുത്തു.ലോറി കയറി ഇറങ്ങിയതിനെ തുടർന്ന് അനന്തു, നിർമ്മൽ വർഗീസ്എന്നിവരുടെ കാലുകൾക്ക് ഒടിവുണ്ട്.ദേശീയപാതയിൽ ചന്തിരൂർ ഗവ.ഹയർസെക്കൻഡറി സ്കൂളിന്റെ വടക്കുഭാഗത്തുള്ള മീഡിയം ഗ്യാപ്പിനു സമീപം തിങ്കൾ പകൽ മൂന്നിലായിരുന്നു അപകടം.
തലയ്ക്കു ഗുരുതരമായി പരിക്കേറ്റ അശോകനെ നെട്ടൂർ ലെക് ഷോർആശുപത്രിയിൽ എത്തിച്ച ഉടനെമരിച്ചു. അപകടത്തെ തുടർന്ന് അരമണിക്കൂറോളം ദേശീയ പാതയിൽ വാഹനഗതാഗതം സ്തംഭിച്ചു. അരൂർ പോലീസും നാട്ടുകാരും ചേർന്നാണ് മൂവരേയും ആശുപത്രിയിൽ എത്തിച്ചത്. അരൂർ മത്സ്യമാർക്കറ്റിൽ മീൻ ലേലം ചെയ്യുന്ന ജോലിയാണ് അശോകന്. ഭാര്യ: ഗീത. മറ്റൊരു മകൾ: അശ്വതി.
