ന്യൂഡൽഹി> വന്യജീവി സങ്കേതങ്ങൾക്കും സംരക്ഷിത ദേശീയ ഉദ്യാനങ്ങൾക്കും ചുറ്റും ഒരു കിലോമീറ്റർ ബഫർസോൺ നിർബന്ധമാക്കിയ ഉത്തരവിൽ ഇളവ് തേടി കേന്ദ്രസർക്കാർ സമർപ്പിച്ച ഹർജിയിൽ കക്ഷി ചേരാൻ കേരളം അപേക്ഷ നൽകും. അന്തിമവിജ്ഞാപനങ്ങൾ ഇറങ്ങിയ മേഖലകൾക്ക് ബഫർസോൺ വിധി നടപ്പാക്കുന്നതിൽ നിന്നും ഇളവ് അനുവദിക്കണമെന്നാണ് കേന്ദ്രത്തിന്റെ ഹർജിയിലെ പ്രധാന ആവശ്യം. ഇതുൾപ്പടെയുള്ള ഹർജികൾ ഈ മാസം 11ന് സുപ്രീംകോടതി പരിഗണിക്കുന്നുണ്ട്.
ക്രിസ്തുമസ് അവധിക്ക് ശേഷം ജനുവരി രണ്ടിനോ മൂന്നിനോ സർക്കാർ ഈ ഹർജിയിൽ കക്ഷിചേരാൻ അപേക്ഷ നൽകും. നേരത്തെ വിധി സമ്പൂർണമായി പുനഃപരിശോധിക്കണമെന്ന് ആവശ്യപ്പെട്ട് കേരളം സുപ്രീംകോടതിയെ സമീപിച്ചിട്ടുണ്ട്. കരട്, അന്തിമ വിജ്ഞാപനം പുറപ്പെടുവിച്ചിട്ടുള്ള മേഖലകൾക്ക് പുറമേ സർക്കാർ പരിഗണനയിലുള്ള വിജ്ഞാപനങ്ങളിൽ ഉൾപ്പെടുന്ന മേഖലകൾക്ക് കൂടി വിധി നടപ്പാക്കുന്നതിൽ നിന്നും ഇളവ് അനുവദിക്കണമെന്ന് കേന്ദ്രസർക്കാർ ആവശ്യപ്പെട്ടിട്ടുണ്ട്. കേരളത്തിലെ 17 വന്യജീവി സങ്കേതങ്ങളുടെയും ആറ് ദേശീയഉദ്യാനങ്ങളുടെയും ബഫർസോൺ ശുപാർശകൾ തയ്യാറാക്കി പരിസ്ഥിതി മന്ത്രാലയത്തിന് സമർപ്പിച്ചിട്ടുണ്ട്.
ഗോവരാ ഫൗണ്ടേഷൻ കേസിലെ സുപ്രീംകോടതി ഉത്തരവിന്റെ അടിസ്ഥാനത്തിലായിരുന്നു ഈ നടപടി. പെരിയാർ ദേശീയ ഉദ്യാനം, പെരിയാർ വന്യജീവി സങ്കേതം ഒഴിച്ചുള്ളവയുടെ കാര്യത്തിൽ കേന്ദ്രം കരട് വിജ്ഞാപനം പുറപ്പെടുവിച്ചിട്ടുണ്ട്. ഈ സാഹചര്യത്തിൽ, കേന്ദ്രത്തിന്റെ ഹർജിയിൽ സുപ്രീംകോടതി അനുകൂല നിലപാട് സ്വീകരിച്ചാൽ ബഫർസോൺ വിഷയത്തിൽ നിലവിലുള്ള ആശങ്കകൾ വലിയ രീതിയിൽ പരിഹരിക്കപ്പെടാനിടയുണ്ട്.
