തിരുവനന്തപുരം
വ്യവസായവകുപ്പിനു കീഴിലുള്ള 17 ടെക്സ്റ്റൈൽ മില്ലിന് ആവശ്യമായ പരുത്തി മുൻകൂറായി സംഭരിച്ച് മില്ലുകൾക്ക് ആവശ്യാനുസരണം വിതരണം ചെയ്യാൻ സംസ്ഥാനത്ത് കോട്ടൺ ബോർഡ്. വ്യവസായ പ്രിൻസിപ്പൽ സെക്രട്ടറി എ പി എം മുഹമ്മദ് ഹനീഷ് ചെയർമാനും ടെക്സ്റ്റൈൽ കോർപറേഷൻ, ടെക്സ്ഫെഡ് മാനേജിങ് ഡയറക്ടർമാർ, കൈത്തറി ഡയറക്ടർ എന്നിവർ അംഗങ്ങളും റിയാബ് സെക്രട്ടറി മെമ്പർ കൺവീനറുമായി ബോർഡ് രൂപീകരിച്ച് സർക്കാർ ഉത്തരവിറക്കി. സംസ്ഥാനത്ത് ആദ്യമായാണ് ഇത്തരമൊരു സംവിധാനമെന്ന് വ്യവസായമന്ത്രി പി രാജീവ് പറഞ്ഞു.
സീസൺ അടിസ്ഥാനമാക്കി മില്ലുകൾക്ക് ആവശ്യമായ പരുത്തി കുറഞ്ഞ വിലയ്ക്ക് സംഭരിക്കുകയാണ് പ്രധാന ചുമതല. നേരത്തേ ഓരോ മില്ലും സ്വന്തം നിലയിൽ സംഭരിച്ചിരുന്നതിനാൽ വിലക്കുറവിന്റെ ആനുകൂല്യം പ്രയോജനപ്പെടുത്താനായിരുന്നില്ല. സംഭരണം ബോർഡ് വഴിയാകുമ്പോൾ സീസണിലെ കുറഞ്ഞ വില കണക്കാക്കി വാങ്ങാനും മില്ലുകളുടെ പ്രവർത്തനലാഭം വർധിപ്പിക്കാനുമാകും.
ബോർഡിന്റെ പ്രാരംഭ പ്രവർത്തനങ്ങൾക്കുള്ള മൂലധനം സർക്കാർ നൽകും. ശേഷം ആവശ്യമെങ്കിൽ നബാർഡ് ഉൾപ്പെടെയുള്ള ധനസ്ഥാപനങ്ങളുടെ പിന്തുണ തേടും. സംഭരണ സൗകര്യമുള്ള മില്ലുകളിൽ പരുത്തി സൂക്ഷിച്ച് ആവശ്യപ്രകാരം വിതരണം ചെയ്യും. അസംസ്കൃതവസ്തു സംഭരണത്തിലെ പ്രശ്നങ്ങൾമൂലം കേന്ദ്ര സർക്കാരിനു കീഴിലുള്ള എൻടിസി മില്ലുകൾ പലതിന്റെയും പ്രവർത്തനം നിലച്ചിരിക്കുകയാണ്. ടെക്സ്റ്റൈൽ കോർപറേഷനു കീഴിൽ എട്ടും സഹകരണ മേഖലയിൽ ഏഴും മില്ലാണ് വ്യവസായവകുപ്പിനു കീഴിലുള്ളത്.
