പെർത്ത്> ഇടംകൈയൻ പേസർ സാം കറൻ അഫ്ഗാനിസ്ഥാനെ തീർത്തു. അഞ്ച് വിക്കറ്റിനാണ് ഇംഗ്ലണ്ടിന്റെ ജയം. കറൻ 3.4 ഓവറിൽ 10 റൺ വഴങ്ങി അഞ്ച് വിക്കറ്റെടുത്തു. അഫ്ഗാനെ 112 റണ്ണിന് പുറത്താക്കിയ ഇംഗ്ലണ്ട് 11 പന്ത് ബാക്കിനിൽക്കേ ലക്ഷ്യം നേടി. സ്കോർ: അഫ്ഗാൻ 112 (19.4) ഇംഗ്ലണ്ട് 5–-113.
ടോസ് നഷ്ടമായി ബാറ്റിങ്ങിന് ഇറങ്ങിയ അഫ്ഗാന് അടിപതറി. കരുത്തുറ്റ ഇംഗ്ലീഷ് പേസർമാർക്കെതിരെ പിടിച്ചിനിൽക്കാനായില്ല. ഇബ്രാഹിം സർദാനും (32) ഉസ്മാൻ ഗനിയും (30) മാത്രമാണ് പോരാടിയത്. രണ്ടക്കം കണ്ടത് നാലുപേർ മാത്രം. ഇംഗ്ലണ്ടിനായി ബെൻ സ്റ്റോക്സും മാർക് വുഡും രണ്ടുവീതം വിക്കറ്റ് നേടി.
മറുപടിയിൽ അൽപ്പം പരിഭ്രമിച്ചെങ്കിലും ഇംഗ്ലണ്ട് കുലുങ്ങിയില്ല. ലിയാം ലിവിങ്സ്റ്റണിന്റെ (21 പന്തിൽ 29*) തണലിൽ ജയത്തിൽ എത്തി. ക്യാപ്റ്റൻ ജോസ് ബട്ലർ 18 റണ്ണടിച്ചു. 26ന് അയർലൻഡുമായാണ് ഇംഗ്ലണ്ടിന്റെ അടുത്തമത്സരം.
