ഭുവനേശ്വർ> കേരള ബ്ലാസ്റ്റേഴ്സിന് ഒരു ജയംവേണം. എടികെ മോഹൻ ബാഗാനെതിരായ വമ്പൻ തോൽവി മായ്ക്കാൻപോന്ന മധുരമേറിയ ജയം. ഐഎസ്എൽ ഫുട്ബോളിൽ മൂന്നാംമത്സരത്തിൽ ഒഡിഷ എഫ്സിയാണ് ബ്ലാസ്റ്റേഴ്സിന്റെ എതിരാളി. ഭുവനേശ്വറിലെ കലിംഗ സ്റ്റേഡിയത്തിൽ ഇന്ന് രാത്രി ഏഴരയ്ക്കാണ് പോരാട്ടം.
കൊച്ചിയിൽ സ്വന്തംതട്ടകത്തിൽ എടികെ ബഗാനോട് 2–-5നായിരുന്നു ബ്ലാസ്റ്റേഴ്സ് വീണത്. പ്രതിരോധം ചിതറിയതാണ് ഇവാൻ വുകോമനോവിച്ചിന്റെ സംഘത്തിന് തിരിച്ചടിയായത്. സ്പാനിഷുകാരൻ വിക്ടർ മൊംഗേൽ ഇന്ന് ആദ്യ 11ൽ ഇടംപിടിച്ചേക്കും. മധ്യനിരയിലെ ഇവാൻ കലിയുഷ്നി–-അഡ്രിയാൻ ലൂണ സഖ്യത്തിലാണ് പ്രതീക്ഷകൾ മുഴുവനും. രണ്ടുകളിയിൽ ഒന്നുവീതം ജയവും തോൽവിയുമാണ് ബ്ലാസ്റ്റേഴ്സിനും ഒഡിഷയ്ക്കും. സ്വന്തംതട്ടകത്തിൽ ആദ്യകളിക്കാണ് ഒഡിഷ ഇറങ്ങുന്നത്. ബ്രസീൽ മുന്നേറ്റക്കാരൻ ദ്യേഗോ മൗറീസിയോയാണ് അവരുടെ കുന്തമുന. ഇരുടീമുകളും ആറുതവണ ഏറ്റുമുട്ടിയപ്പോൾ ബ്ലാസ്റ്റേഴ്സ് രണ്ടിൽ ജയിച്ചു. ഒഡിഷ ഒന്നിലും. മൂന്നെണ്ണം സമനിലയായി.
