തിരുവനന്തപുരം
കേന്ദ്രസർക്കാർ നിരോധിച്ച റിഹാബ് ഇന്ത്യ ഫൗണ്ടേഷനുമായി ഐഎൻഎല്ലിന് ബന്ധമില്ലെന്ന് മന്ത്രി അഹമ്മദ് ദേവർകോവിൽ. അടിസ്ഥാനരഹിതമായ ആരോപണങ്ങളാണ് ബിജെപി സംസ്ഥാന പ്രസിഡന്റ് കെ സുരേന്ദ്രൻ ഉന്നയിച്ചത്. ആരോപണം തെളിയിക്കാൻ വെല്ലുവിളിക്കുന്നു. ഡൽഹി കേന്ദ്രമായി പ്രവർത്തിക്കുന്ന നിരവധി എൻജിഒകൾ ഉണ്ട്. ആദ്യ ഘട്ടത്തിൽ നല്ലരീതിയിലാണ് പ്രവർത്തനം മുന്നോട്ട് പോയത്.
ചില നിക്ഷിപ്ത താൽപ്പര്യക്കാർ കയറിക്കൂടി. അത് മനസ്സിലാക്കിയതു കൊണ്ട് പിന്നീട് പ്രവർത്തനത്തിൽനിന്ന് മാറി നിന്നു.
സുരേന്ദ്രന്റേത് ഉണ്ടയില്ലാ വെടിയാണ്. എല്ലാ തീവ്രവാദ സരണികളെയും വിട്ടുവീഴ്ചയില്ലാതെ എതിർക്കുക എന്നത് ഐഎൻഎല്ലിന്റെയും എൽഡിഎഫ് സർക്കാരിന്റെയും പ്രഖ്യാപിത നിലപാടാണ്. ഇത്തരം ഒരു സംഘടനയുമായും തനിക്ക് ബന്ധമില്ലെന്നും മന്ത്രി ദുബായിൽ പറഞ്ഞു.
