പള്ളുരുത്തി
സംസ്ഥാന സൈക്ലിങ് ടീമിൽ ഇടംപിടിച്ച് പള്ളുരുത്തി കടേഭാഗം സ്വദേശി കെ എസ് അലൻ. 27––ാമത് കേരള റോഡ് സൈക്ലിങ് സ്റ്റേറ്റ് മീറ്റിൽ രണ്ടാംസ്ഥാനം നേടിയാണ് അലൻ കേരള ടീമിൽ ഇടംപിടിച്ചത്. ഡിസംബർ നാലിന് തെലങ്കാനയിൽ നടക്കുന്ന നാഷണൽ മീറ്റിൽ 18 വയസ്സിൽ താഴെയുള്ള വിഭാഗത്തിൽ കേരളത്തിനായി അലൻ ട്രാക്കിലിറങ്ങും.
കഴിഞ്ഞ മൂന്ന് വർഷമായി സൈക്ലിങ്ങിൽ കഠിന പരിശീലനത്തിലാണ് അലൻ. ദിവസവും 80 മുതൽ 120 കിലോമീറ്റർവരെ സൈക്കിൾ ചവിട്ടും. പുലർച്ചെ നാലോടെ കണ്ടെയ്നർ റോഡിലാണ് പരിശീലനം. കൊല്ലം സൈക്ലിങ് അസോസിയേഷന്റെയും എറണാകുളം സൈക്ലിങ് അസോസിയേഷന്റെയും ജില്ലാ മത്സരങ്ങളിൽ ഒന്നാംസ്ഥാനം നേടിയിട്ടുണ്ട്.
ഈ വർഷം കേരള ഗെയിംസിൽ സംസ്ഥാനചാമ്പ്യനാണ്. പെരുമ്പാവൂർ എംഇഎസ് കോളേജിലെ ഒന്നാംവർഷ ബിരുദ വിദ്യാർഥിയായ അലൻ കടേഭാഗം കളത്തിപ്പറമ്പിൽ ശ്രീജിത് കുമാറിന്റെയും അമ്പിളിയുടെയും മകനാണ്.
