ഇനിയും ഇടത് സർക്കാർ വരും ; രാഹുലിനോട്‌ ശിവഗിരി സന്യാസിമാർ

തിരുവനന്തപുരം
രാഹുൽ ഗാന്ധിക്ക് മുന്നിൽ മുഖ്യമന്ത്രി പിണറായി വിജയനെ പ്രശംസിച്ച് വർക്കല ശിവഗിരി മഠം സന്യാസിമാർ. ഭാരത് ജോഡോ യാത്രയുടെ ഭാഗമായി ബുധനാഴ്ച മഠത്തിൽ എത്തിയ രാഹുൽ ഗാന്ധിയോട് കേരളത്തിൽ വീണ്ടും ഇടത് സർക്കാർ അധികാരത്തിൽ എത്തുമെന്നും ശ്രീനാരായണ ഗുരുധർമ സംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ പറഞ്ഞു. ശ്രീനാരായണഗുരു സങ്കൽപ്പത്തോട് മുഖ്യമന്ത്രിക്ക് അനുഭാവ സമീപനമാണ്. ശിവഗിരിയിലും ചെമ്പഴന്തി ഗുരുകുലത്തിലും കൺവൻഷൻ സെന്റർ സ്ഥാപിച്ചു. വിജെടി ഹാളിന് അയ്യൻകാളിയുടെ പേരുനൽകി. ഇവയെല്ലാം ശ്രീനാരായണ ദർശനത്തിന് അനുകൂലമായ പ്രവൃത്തിയാണ്. ഇത് തുടർന്നാൽ ഇനിയും ഇടതു സർക്കാർ അധികാരത്തിലെത്തും. ശ്രീനാരായണീയർക്ക് കോൺഗ്രസിൽ പ്രാതിനിധ്യം കുറവാണ്. കോൺഗ്രസിൽനിന്ന് ഒരു എംഎൽഎ മാത്രമേയുള്ളൂവെന്നും അദ്ദേഹം പറഞ്ഞു. പ്രതിപക്ഷ നേതാവ് വി ഡി സതീശന്, കെ സി വേണുഗോപാല്, രമേശ് ചെന്നിത്തല, കൊടിക്കുന്നില് സുരേഷ്, പാലോട് രവി എന്നിവരും രാഹുലിനൊപ്പം ഉണ്ടായിരുന്നു.