ദോഹ> ഖത്തറിൽ സ്കൂൾ ബസിനുള്ളിൽ മലയാളി ബാലിക മരണപ്പെട്ടു. വക്ര സ്പ്രിംഗ് ഫീൽഡ് കിന്റർഗാർട്ടനിലെ വിദ്യാർഥിനിയായ മിൻസ മറിയം ജേക്കബ് (4 വയസ്സ്) ആണ് സ്കൂൾ ബസിനുള്ളിൽ മരിച്ച നിലയിൽ കാണപ്പെട്ടത്. മിൻസയുടെ പിറന്നാൾ ദിനമായിരുന്നു ഇന്നലെ
രാവിലെ ആറുമണിക്ക് സ്കൂളിലേക്കുള്ള യാത്രാമധ്യേ ബസ്സിൽ കുട്ടി ഉറങ്ങിപ്പോയതായി പറയുന്നു. വിദ്യാർത്ഥി മറ്റുള്ളവരോടൊപ്പം സ്കുളിൽ ഇറങ്ങാതിരുന്നത് ബസ് ജീവനക്കാരന്റെ ശ്രദ്ധയില് പെട്ടില്ല. അകത്ത് കുട്ടിയുള്ളത് അറിയാത്തതിനാൽ പൂട്ടിയ ബസ് തുറസ്സായ സ്ഥലത്താണ് നിർത്തിയത്.
രാവിലെ 11.30 ന് ഡ്യൂട്ടി പുനരാരംഭിക്കാൻ ബസിൽ തിരിച്ചെത്തിയപ്പോഴാണ് ജീവനക്കാർ കുട്ടിയെ ബസ്സിനുള്ളിൽ അബോധാവസ്ഥയിൽ കണ്ടത്. പെട്ടെന്ന് തന്നെ ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാൻ ആയില്ല മരണത്തിന്റെ കൃത്യമായ കാരണം ഇതുവരെ അറിവായിട്ടില്ല.
കോട്ടയം ചിങ്ങവനം സ്വദേശികളായ അഭിലാഷ് ചാക്കോ, സൗമ്യ ദമ്പതികളുടെ ഇളയ മകളാണ്. സഹോദരി മിഖ എം.ഇ.എസ് ഇന്ത്യൻ സ്കൂൾ മൂന്നാം തരം വിദ്യാർത്ഥിനിയാണ്
