ന്യൂയോർക്ക്
റാഫേൽ നദാലിന് യുഎസ് ഓപ്പണിന്റെ പ്രീ ക്വാർട്ടറിൽ മടക്കം. അമേരിക്കയുടെ ഫ്രാൻസിസ് തിയാഫോ സ്പാനിഷുകാരനെ വീഴ്ത്തി. കാർലോസ് അൽകാരെസ്, ആൻഡ്രേ റുബെലെവ്, യാന്നിക് സിന്നെർ എന്നിവരും ക്വാർട്ടറിലേക്ക് മുന്നേറി. വനിതകളിൽ ഒന്നാംസീഡ് ഇഗ ഷ്വിയാടെക്, ജെസീക പെഗുല, കരോളിന പ്ലിസ്കോവ എന്നിവരും അവസാന എട്ടിൽ ഇടംപിടിച്ചു.
ഇരുപത്തിമൂന്നാം ഗ്രാൻഡ് സ്ലാം കിരീടം ലക്ഷ്യമിട്ടിറങ്ങിയ നദാലിനെ ആവേശകരമായ പോരാട്ടത്തിലാണ് തിയാഫോ മടക്കിയത് (6–4, 4–6, 6–4, 6–3). ഈ വർഷം ഗ്രാൻഡ് സ്ലാമിൽ നദാലിന്റെ ആദ്യ തോൽവിയാണ്. പരിക്ക് വലയ്ക്കുന്ന നദാൽ, യുഎസ് ഓപ്പണിലേക്കുള്ള തിരിച്ചുവരവ് സംശയത്തിലാക്കിയാണ് മടങ്ങുന്നത്. റഷ്യയുടെ റുബലേവിനെ തിയാഫോ ക്വാർട്ടറിൽ നേരിടും.
പത്തൊമ്പതുകാരനായ അൽകാരെസ് മൂന്നുമണിക്കൂർ 53 മിനിറ്റ് നീണ്ട പോരിൽ ക്രൊയേഷ്യയുടെ മരിൻ സിലിച്ചിനെ കീഴടക്കി (6–4, 3–6, 6–4, 4–6, 6–3). സിന്നെറാണ് ക്വാർട്ടറിലെ എതിരാളി. വനിതകളിൽ ഷ്വിയാടെക് കടുത്ത പോരാട്ടത്തിൽ ജർമനിയുടെ യുലി നിയെമെയറിനെ മറികടന്നു (2–6, 6–4, 6–0). പെഗുലയാണ് ക്വാർട്ടറിൽ ഷ്വിയാടെക്കിന്റെ എതിരാളി.
