മനാമ
വിമാന സർവീസുകൾ ആറു മണിക്കൂറിലേറെ വൈകിയാൽ ഉംറ ബുക്കിങ് സ്വയമേവ റദ്ദാകുമെന്ന് ഹജ്ജ്, ഉംറ മന്ത്രാലയം അറിയിച്ചു. ഇവർക്ക് ഉംറ പെർമിറ്റ് സമയം അവസാനിച്ചാലുടൻ പുതിയ പെർമിറ്റിന് ബുക്ക് ചെയ്യാൻ സാധിക്കും. മറ്റു ഗൾഫ് രാജ്യങ്ങളിൽനിന്ന് ഇ–- -ടൂറിസ്റ്റ് വിസയിൽ എത്തുന്ന പ്രവാസികൾക്ക് സൗദിയിൽ പ്രവേശിക്കുന്നതിനുമുമ്പുതന്നെ ‘ഇഅ്തമർനാ’ ആപ് വഴി ഉംറ പെർമിറ്റ് എടുക്കാമെന്നും മന്ത്രാലയം അറിയിച്ചു.
വിദേശ തീർഥാടകർ ഉംറ നിർവഹിക്കുന്ന സമയത്തിന് ആറു മണിക്കൂർ മുമ്പ് ആപ് വഴി ബുക്കിങ് നടത്തണമെന്നാണ് വ്യവസ്ഥ. പെർമിറ്റ് സമയത്തിൽ മാറ്റം വരുത്താൻ ആഗ്രഹിക്കുന്നവർക്ക് പെർമിറ്റ് സമയത്തിന്റെ നാലു മണിക്കൂർമുമ്പ് പെർമിറ്റ് റദ്ദാക്കാം. ഇവർക്ക് ആദ്യ പെർമിറ്റ് കാലാവധി അവസാനിച്ചാലുടൻ പുതിയ പെർമിറ്റിന് ബുക്ക് ചെയ്യാമെന്നും മന്ത്രാലയം അറിയിച്ചു.
