കൊച്ചി
സർക്കാരിന്റെ മുൻകൂർ അംഗീകാരമില്ലാത്ത തസ്തികകളിൽ നിയമിക്കപ്പെടുന്ന കോളേജ് അധ്യാപകർക്ക് ശമ്പളം നൽകാൻ സർക്കാരിന് ബാധ്യതയില്ലെന്ന് ഹൈക്കോടതി ഡിവിഷൻ ബെഞ്ച്. എംജി സർവകലാശാല നിയമപ്രകാരം ശമ്പളം നൽകാൻ ബാധ്യതയില്ലെന്ന സർക്കാർവാദം തള്ളിയ സിംഗിൾ ബെഞ്ച് വിധിക്കെതിരെ സമർപ്പിച്ച അപ്പീലിലാണ് പി ബി സുരേഷ്കുമാർ, സി എസ് സുധ എന്നിവരടങ്ങുന്ന ഡിവിഷൻ ബെഞ്ചിന്റെ ഉത്തരവ്.
സർക്കാരിന്റെ അംഗീകാരം ലഭിക്കുന്നതിനുമുമ്പ് നിയമനം ലഭിച്ച കൊച്ചിൻ കോളേജ് അധ്യാപകരുടെ ഹർജിയാണ് സിംഗിൾ ബെഞ്ച് അനുവദിച്ചത്. ഈ വിധിക്കെതിരെയായിരുന്നു സർക്കാർ അപ്പീൽ. സർക്കാരിനുവേണ്ടി സീനിയർ ഗവ. പ്ലീഡർ എ ജെ വർഗീസ്, എംജി സർവകലാശാല സ്റ്റാൻഡിങ് കോൺസൽ സുറിൻ ജോർജ് ഐപ്പ് എന്നിവർ ഹാജരായി.
